ताजा समाचार

असार ९ गते २०७६

विश्वकप क्रिकेटमा हारेपनि इमरानले कायम गरे नयाँ रेकर्ड

जारी विश्वकप क्रिकेटबाट दुई खेल खेल्न बाँकि हुदै दक्षिण अफ्रिका सेमिफाइनलको दौडबाट बाहिरिएपनि स्पिन बलर इमरान ताहिरले भने नयाँ रेकर्ड बनाएका छन् ।

पाकिस्तानविरुद्ध २ विकेट लिदै ताहिरले विश्वकपमा दक्षिण अफ्रीकाको तर्फबाट सर्वाधिक विकेट लिने खेलाडी बनेका हुन् ।

पाकिस्तानमा जन्मिएका ४० बर्षिय ताहिरले विश्वकपमा ३९ विकेट लिदै सो रेकर्ड बनाएका हुन् । सन् २०११, २०१५ र २०१९ गरी ३ विश्वकप खेलेका ताहिरले विश्वकपको २०औ खेलमा ३९ विकेट लिएका हुन् ।

उनले यस अघि चार विश्वकपका २५ खेल खेलेर ३८ विकेट लिएका एलेन डोनाल्डको रेकर्ड तोडेका हुन् । डोनाल्ड सन् १९९२ देखि २००३ सम्म गरी चार विश्वकप खेलेका थिए । त्यस्तै १९९६ देखि २००७ सम्म चार विश्वकपका ३१ खेल खेलेका शान पालाकले विश्वकपमा ३१ विकेट लिएका छन् ।

विश्वकपमा धेरै विकेट लिने रेकर्ड भने अहिलेसम्म अस्ट्रेलियाका ग्लेन म्याग्राको नाममा रहेको छ । सन् १९९६ देखि २००७ सम्म गरी चार विश्वकप खेलेका म्याग्राले ३९ खेलमा कुल ७१ विकेट लिदै विश्वकपमा धेरै विकेट लिने रेकर्ड बनाएका छन् । प्रतियोगितामा पाकिस्तानसँगको खेलमा हार बेहोरेसँगै दक्षिण अफ्रीकाको सेमिफाइनल पुग्ने संभवाना भने सकिएको छ।