सरकारका प्रवक्ता सूचना तथा सञ्चार मन्त्री गोकुल बाँस्कोटाले राष्ट्रपतिले सरकारको नीति तथा कार्यक्रम प्रस्तुत गर्दा ‘मेरो सरकार’ भन्नु स्वभाविक भएको बताएका छन् ।
बिहीबार मन्त्रालयमा आयोजित नियमित पत्रकार सम्मेलनमा उनले मेरो सरकार भन्नु स्वभाविक भएको भन्दै यसमा आवश्यकता भन्दा बढी टिकाटिप्पणी गर्न आवश्यकता नभएको जिकिर गरेका हुन् ।
उनले राष्ट्रपतिले ‘मेरो सरकार’भन्दा आलोचना गर्नेले ‘महेन्द्रले भन्न शुरू गरेको ‘जय नेपाल’ के गर्ने ? भन्दै कांग्रेसलाई प्रश्न गरे ।
साथै उनले शब्दशब्दमा जाने हो भने जय नेपाल प्रहरीले पनि भन्छ, कांग्रेसले पनि भन्छ भन्दै २०१७ सालमा प्रजातन्त्र कू गरेपछि महेन्द्रले जय नेपाल भनेका थिए, के यो शब्द डिक्सनेरीबाट हटाउने ? उनले आक्रोश ब्यक्त गरे ।
पहिलो जननिर्वाचित प्रधानमन्त्री बीपी कोइराला चीन जाँदा पनि मेरो सरकार भन्ने गरेको उनले दाबी गरे ।
