ताजा समाचार

वैशाख २५ गते २०७६

जनताका कुँडिएका मन मिलाउन जागरण अभियान : महामन्त्री खड्का

नेपाली कांग्रेसका महामन्त्री पूर्णबहादुर खड्काले जनताका कुँडिएका मन मिलाउन कांग्रेसले देशव्यापी जागरण अभियान सञ्चालन गरेको बताएका छन् ।

हिमाल, पहाड, तराई, मधेश, नेपाली कांग्रेस राष्ट्रिय जागरण अभियान गण्डकी प्रदेशको राजधानी पोखरामा शुभारम्भ गर्दै महामन्त्री खड्काले जागरण अभियान पश्चात् जनताले खोजेको पार्टी नेपाली कांग्रेस हुने दावी गरे ।

देशको सबै काममा १ नं. को पार्टी राजनीतिक हिसावले दोस्रो हुन नसक्ने भन्दै उनले कांग्रेसलाई बलियो पार्टी बनाउन नेता कार्यकर्ताले पार्टी भित्रको तिक्ततालाई थाती राखेर अभियानमा होमिन निर्देशन दिए । ‘पार्टी भित्र चित्त नबुझेका कुरा राख्ने ठाउँ धेरै छन् । पार्टीको १४औं महाधिवेशन पनि नजिकिंदैछ । त्यहाँ गम्भीर र निर्मम छलफल हुन सक्छ । त्यसैले विवाद, तिक्तता, असन्तुष्टि, फरक मत लगायत सबै विषय थाती राखेर पार्टीको महाअभियानमा होमिऔं र बलियो कांग्रेस बनाउन लागौं’, नेता खड्काले भने ।

उनले अभियानले पार्टी भित्रको आन्तरिक समस्या न्यूनीकरण हुनुका साथै कार्यकर्ता र जनतामा उत्साह जगाउने दावी गरे ।
साथै जनताले खोजेको कांग्रेस बनाउन, विगतका कमजोरी सच्याउन, जनताका पिर कर्मा र गुनासा सुन्न जागरण अभियान महत्वपूर्ण हुने भन्दै यसमा सबै नेता कार्यकर्ता सक्रिय भएर लाग्नुपर्नेमा नेता खड्काले जोड दिए ।

नेता खड्काले जागरण अभियान ३ चरणमा देशव्यापी हुन लागेको समेत जानकारी दिए । पहिलो अभियान १ महिनाको ७७ वटै जिल्लामा हुने, दोस्रो अभियान ३ सय २० प्रदेश निर्वाचन क्षेत्रमा १५ दिन चल्ने र तेस्रो अभियान सबै स्थानीय तहमा १० दिन सञ्चालन गरिने उनले जानकारी दिए । उनले सरकारको अधिनायकवादलाई रोक्न समेते जागरण अभियान सफल हुने स्पष्ट पार्दैै २ तिहाईको दम्भमा सबै क्षेत्रमा हस्तक्षेप बढाएको बताए ।

उनले प्रधानमन्त्री ओलीले संसद र संसदीय अभ्यासलाई कमजोर बनाउन उद्दत भएको आरोप समेत लगाए । महामन्त्री खड्कालले कम्युनिस्ट सरकारको आलोचना जनता, बुद्धिजीवी वर्ग र व्यापारी वर्गले समेत विरोध गरेको बताए । अहिलेको अवस्थामा लोकतन्त्र र जनताको मुद्दा बोली दिने पार्टीका रुपमा कांग्रेसलाई लिने गरेको उनको भनाइ छ ।

उनले कांग्रेसले टिकट वितरण प्रक्रियामा कमजोरी गरेका कारण पराजयको अवस्था आएको स्पष्ट पारे । पार्टीलाई एकढिक्का बनाउनका लागि जागरण अभियान महत्वपूर्ण हुने उनले बताए । अभियानले नेता बलियो होइन कि कार्यकर्ता र पार्टी बलियो हुने गरी काम हुने नेता खड्काको भनाइ थियो ।

अर्को प्रसंगमा नेता खड्काले कांग्रेसले विश्वकै नमुना विधान बनाएकाले कार्यान्वयनमा सबै दवाव आवश्यक रहेको बताए । उनले विधानमा १÷२ कुरा बाहेक सबै विषय नयाँ र फरक हुनुका साथै सबै पार्टी भन्दा पृथक रहेको स्पष्ट पारे ।

नेता खड्काले उम्मेदवार चयन तत स्थानीय पार्टी संयन्त्रले, समानुपातिक दुवै संसदका सांसद १ पटक भन्दा बढी बन्न नपाउने जस्ता महत्वपूर्ण विषय नयाँ विधानमा उल्लेख गरिएको बताए । उनले अभियानमार्फत सबै जनताले विश्वास गर्न लायक पार्टी बनाउन आवश्यक रहेको स्पष्ट पारे । नेता खड्काले अभियानसंगै सदस्यता विस्तार अभियान पनि संगसंगै सञ्चालन हुने जानकारी दिए ।

कांग्रेस केन्द्रीय सदस्य अर्जुन जोशीले वर्तमान सरकार संविधान विरोधी गतिविधिमा उद्दत रहेको बताए । लोकतन्त्र कम्युनिष्टले होइन कांग्रेसले जोगाउनुपर्ने समेत उनले स्पष्ट पारे । विगतमा भएका गल्ती सच्याएर जनता माझ जानु नै कांग्रेका लागि राम्रो हुने उनले बताए ।

कास्की कांग्रेसका सभापति कृष्ण केसीले जागरण अभियानले पाटीलाई एकढिक्का बनाउने विश्वास व्यक्त गरे । कार्यक्रममा कास्की कांग्रेसका उपाध्यक्ष आईबहादुर गुरुङ, सचिव सुदिपमोहन भट्टराई लगायतले बोलेका थिए ।