ताजा समाचार

वैशाख २४ गते २०७६

बाबुरामले लिए उपेन्द्रबाट सपथ

समाजवादी पार्टी नेपालको सदस्यका रूपमा पूर्व प्रधानमन्त्री डा. बाबुराम भट्टराईले उपप्रधानमन्त्री उपेन्द्र यादवबाट शपथ ग्रहण गरेका छन् ।

बाबुराम नेतृत्वको नयाँ शक्ति नेपाल र उपेन्द्र नेतृत्वको संघीय समाजवादी फोरमबीच एकीकरण भई हिजो (सोमबार) समाजवादी पार्टी, नेपाल घोषणा गरिएको हो । नवघोषित पार्टीको आज बुद्धनगरस्थित क्वालिटी ब्यांक्वेटमा आयोजित पार्टीको केन्द्रीय समितिको पहिलो पूर्ण बैठकमा उपेन्द्रले बाबुरामसहित केन्द्रीय समितिका ४३० सदस्यलाई शपथ ग्रहण गराएका हुन् ।

उपेन्द्र पार्टी अध्यक्ष हुन् भने बाबुराम संघीय परिषद् अध्यक्ष हुन् । पार्टीको आधारपत्रमा केन्द्रीय समितिको अध्यक्ष कार्यकारी हुने व्यवस्था छ । उपेन्द्रले कार्यकारी अध्यक्षका हैसियतमा बाबुरामसहित अर्का वरिष्ठ नेता अशोक राईसहित सबै केन्द्रीय नेतालाई शपथ गराए ।

बैठकमा केन्द्रीय समितिका वयोबृद्ध नेता प्रेमकृष्ण पाठक (८० वर्ष) ले उपेन्द्रलाई पहिला शपथग्रहण गराए । लगत्तै यादवले पाठकसहित सबै नेतालाई शपथग्रहण गराएका हुन् ।