वैशाख २२ गते २०७६

ताजा समाचार

वैशाख २२ गते २०७६

ट्रिपरमा फोहोर लगी कालीखोलामा फाल्ने टप्स बोर्डिङलाई ५० हजार जरिवाना



स्कुलको फोहोर ट्रिपरमा लगेर कालीखोलामा फाल्ने टप्प बोर्डिङ स्कुललाई ५० हजार जरिवाना गराइएको छ । शनिबार बेलुका आएको ट्रिपरले फोहोर फालेको स्थानीयले देखेपछि जनप्रतिनिधि, स्थानीय र नागरिक समाजको पहलमा टप्सलाई जरिवाना गर्ने निर्णय भएको हो ।

पोखरा १० रामघाटमा रहेको टप्स स्कुलले ट्रिपरमा हालेर फोहोर पोखराको २० अन्तर्गत कालीखोलाको भीरमा फालेको स्कुलका सञ्चालक रत्नमान गुरुङले जनप्रतिनिधिसँग स्वीकारेका छन् । फोहरमैला व्यवस्थापन ऐन २०६८ बमोजिम स्कुललाई ५० हजार जरिवाना गराउने निर्णय भएको पोखरा २० का वडाध्यक्ष सीम गुरुङले जानकारी दिए ।

आइतबार भएको छलफलमा टप्सका सञ्चालक रत्नमान आएर जिम्मेवारी लिएनन्, उनले प्रतिनिधिको रुपमा शिक्षक चित्र गुरुङलाई पठाए । सुरुमा पोखरा महानगरले १५ हजार जरिवाना लिने तयारी गरे पनि स्थानीयको विरोधपछि ५० हजार जरिवाना लिने निर्णय भएको हो । वडाध्यक्ष गुरुङ भन्छन्, ‘फालेको फोहोर सबै उठाएर लैजाने, आइन्दा यसरी नफाल्ने प्रतिवद्धता गराउँदै ५० हजार जरिवाना गराउने निर्णय भएको छ ।’

वृहत सफाइ अभियानका अभियन्ता रामबहादुर पौडेलले महानगरलाई नमुना बनाउन सबैले योगदान गर्नुपर्ने बताए । उनले शैक्षिक संस्था, अग्रणीहरुले सरसफाइको नेतृत्व गर्नुपर्नेमा सहरको फोहोर गाउँमा लगेर फाल्नु शोभनीय नभएको बताए ।

हामी पाठकको रचनात्मक प्रतिक्रिया, कमेन्ट, सेयरको सराहना गर्दछौं । तर नेपालदुतमा प्रकाशित समाचार वा अन्य सामग्री जस्ताको तस्तै वा परिमार्जनसहित अन्य न्युज पोर्टलमा प्रकाशित नगर्न अनुरोध छ ।