ताजा समाचार

वैशाख १८ गते २०७६

फोरम-नयाँ शक्ति मिल्दै, यादव, भट्टराई दुवै अध्यक्ष

संघीय समाजवादी फोरम नेपाल र नयाँ शक्ति नेपालबीच एकीकरणको घोषणा गर्ने तयारी भइरहेको छ । २ पार्टीबीच लामो समयदेखि एकीकरणका लागि पहल भइरहे पनि बल्ल अहिले आएर टुङ्गोमा पुगेको छ ।

नयाँ शक्तिसँग एकीकरण गर्ने भएपछि फोरम नेपालले आफ्नो केन्द्रीय महाधिवेशन सार्ने तयारी पनि गरिरहेको फोरम नेपाल पार्टी कार्यालय स्रोतले जनाएको छ ।

वैशाख २८, २९ र ३० गते जनकपुरमा महाधिवेशन गर्ने मिति तय गरेको थियो । तर नयाँ शक्तिसँग एकीकरण गरेपछि अर्को एकता महाधिवेशनको मिति तोक्ने तयारी भइरहेको बताइएको छ ।

एकीकरणको विषयमा २ दलको वार्ता समितिको बीचमा सहमति भइसकेको छ, त्यसलाई पार्टीको आधिकारिता दिनका लागि नयाँ शक्ति नेपालले वैशाख २० गते सचिवालयको बैठक बोलाएको छ ।

बैठकमा फोरम नेपालसँग एकीकरण हुने विषयमा छलफल हुने र त्यसलाई पारित गर्ने नयाँ शक्ति पार्टीका १ नेताले बताए । त्यस्तै त्यही विषयमा छलफल गर्नका लागि फोरम नेपालले वैशाख २१ गतेका लागि केन्द्रीय समितिको बैठक बोलाएको छ ।

बैठकमा नयाँ शक्तिसँगको एकीकरण र महाधिवेशनको बारेमा छलफल हुने बताइएको छ । अहिलेसम्म एकीकृत पार्टीमा दुवै दलका अध्यक्ष रहने गरि अध्यक्षमण्डल रहनेछ । अर्थात नेकपाको मोडेलमा फोरम नेपालका अध्यक्ष उपेन्द्र यादव र नयाँ शक्ति नेपालका संयोजक डा.बाबुराम भट्टराई २ जना नै अध्यक्ष रहने बताइएको छ । निर्णय गर्ने अधिकार दुवैजनाको समान रहने भए पनि वरियतामा भट्टराई पहिलो नम्बरमा रहने बताइएको छ ।

अरु पदको बारेमा २ पार्टीबीच छलफल भइरहेको छ । नयाँ शक्ति नेपालले एउटा अर्को शर्त पनि अघि सारेको छ, त्यो सरकार छाड्ने कुरा । नयाँ शक्तिले फोरम नेपाललाई सरकार छाड्न भनेको छ । यसको विषयमा फोरम नेपालले कुनै निर्णय दिएको छैन । यस विषयमा पार्टीमा छलफल गरेर जानकारी गराउने भनेको छ ।

फोरम नेपालले राष्ट्रिय जनता पार्टी (राजपा) नेपाललाई यो एकीकरणमा सामेल गराउन भनेको छ । त्यसका लागि १/२ पटक ३ वटै दलको बीचमा छलफल पनि भएको छ, तर राजपा नेपालको तर्फबाट खासै सक्रियता नदेखाएपछि फोरम नेपाल र नयाँ शक्ति नेपाल अगाडि बढेको छ ।

राजपा नेपाल र फोरम नेपालबीच पत्रको आदान प्रदान मात्र भएको छ । एकीकरणका लागि औपचारिक वार्ता भएको छैन ।