२१औं पुस्तासम्म कुनै मन्दिरको मूल पुजारी हुँदै आएको सुन्दा अचम्म लाग्ला तर गोर्खाको मनकामना मन्दिरमा एउटै परिवारको २१ औँ पुस्ताले मूल पुजारीका रुपमा अहिलेसम्म काम गरिरहेको छन् ।
मन्दिरका मूल पुजारी इन्सानबहादुर थापामगरले आफू २१ औँ पुस्ताका रुपमा मगर पुजारी बनेको बताए । उनको भनाइमा राजाराम शाहका रानीको नामबाट मनकामना मन्दिर रहेको हो । राजपरिवारमा सुसारेको रुपमा रहेका लखन थापामगरका पालादेखि यस मन्दिरमा इन्सानका पुस्ताले मुख्य पुजारीको रुपमा काम गर्दै आएका हुन् ।
उनले भने, ‘यसको स्थापना कालदेखि नै मगर समुदाय मूल पुजारी हुँदै आएको २१ औँ पुस्ता पुग्यो । मेरा बुबा लोकबहादुर र बाजे प्रेमबहादु पनि यहाँकै पुजारी हुनुहुन्थ्यो ।’ लखन थापामगर राज परिवारको सुसारे हुँदै गर्दा राजाको निधनपछि रानी सति जाने समयमा उनलाई म तिमीलाई फेरि मेरो सेवा गर्ने मौका दिने छु भनी सति गएको र पछि खेत जोत्दा शिला भेटिएपछि मन्दिर स्थापना गरी पूजा गर्न लागिएको उनले बताए ।
अहिले मनकामना मन्दिरमा सोही वंशजको जेठो छोराले मूल पुजारीको नेतृत्व सम्हाल्दै आएको छ । आफूले विसं २०२६ मा १० वर्षको उमेरदेखि पुजारीका रुपमा काम गर्दै आएकामा त्यसको १४ वर्षपछि मूल पुजारीको भूमिका निर्बाह गरेकोे इन्सानले बताए । काकाले बाबुको शेषपछि आफू मूल पुजारी हुनुपर्ने भन्दै सर्वोच्चमा रिट दायर गरे पनि आफ्नै पक्षमा फैसला भएपछि आफूले मूल पुजारीको रुपमा २०४० सालदेखि काम गरिरहेको र आफ्नो जेठो छोरा निसानले अहिले पुजारीको काम सिकिरहेको उनले बताए ।
सन्तानमा जेठो छोरा नभएर छोरी भएमा भाइमा मूल पुजारीको जिम्मेवारी सर्ने इन्सानको भनाइ थियो । मन्दिरमा मूल पुजारीसहित ५ पुजारीले काम गर्दै आएका छन् । शहीद लखन गाउँपालिका–२ मा पर्ने सो मन्दिर स्थापनाकालदेखि नै पुजारीका रुपमा रहेका मगर समुदायका साथै हरेक पर्वमा मन्दिरमा हुने पूजामा काठमाडौंबाट तान्त्रिक गुरुहरूसमेत आउने गरेका छन् ।
अहिले मन्दिरमा रहेका पुजारीमध्ये १ बह्माण समुदायको र अन्य पुजारी मगरकै घर परिवारका सदस्य छन् ।
त्यहाँ उठेको भेटीले यी सबै खर्च पुर्याउनु पर्ने इन्सानले बताए । मनकामना देवीको शक्ति अजिवको रहेको चर्चा गर्दै उनले देशमा भएका महत्वपूर्ण घटनामा कुनै न कुनै रूपमा अग्रिम सङ्केत मिल्ने र दरबार हत्या काण्ड, विनाशकारी भूकम्प जस्ता घटनामा आफूले पहिले नै सङ्केत पाएको जानकारी दिए । मनकामना केबुलकार बन्ने विषयमा पनि पहिले नै सङ्केत मिलेको इन्सानको भनाइ थियो । \
मूल पुजारी मगरका अनुसार उनीहरू नियमित चोखो भएर पूजामा बस्नुपर्ने घर परिवारमा जुठो पर्दा कुटुम्बले यो काम हेर्ने गरेको र ठूलाठूला पूजाआजामा मदिरा नभई नहुने भएकाले प्रसादका रुपमा खाए पनि अन्य पूजामा भने प्रयोग नगर्ने गरेको उनले बताए । पहिलेको तुलनामा अहिले भक्तजनको चाप बढ्दै गएको छ । मंसिर, पुस, माघ र फागुन महीनाको, शनिबार, सोमबार, मङ्गलबार र शुक्रबार भक्तजनको भीड लाग्ने गरेकामा अहिले जुनसुकै बार पनि भक्तजनको घुइँचो हुने मूल पुजारी इन्सानले बताए ।
