प्रतिबन्धित नेकपाका महासचिव नेत्रविक्रम चन्द विप्लवले भारतीय गोरखा सेनामा कार्यरत नेपाली युवालाई चीनसँगको युद्धमा नलगाउन माग गर्दै विदेशीको भाडावाल लडाकु नबन्न नेपालीलाई आह्वान गरेका छन् ।
शनिबार विज्ञप्ति निकालेर उनले भारत–चीन सीमामा तनाव बढेका बेला बिदामा रहेका गोरखा सैनिकहरुलाई फिर्ता बोलाउनुले त्यहाँ उनीहरुलाई परिचालन गर्ने सम्भावना देखिएको औंल्याएका छन् । विप्लवले भनेका छन्, ‘दुई समान छिमेकीका बीचमा भएको नेपाल र नेपाली जनताका लागि यो अति संवेदनशील र खतरनाक छ ।’
पैसा र चाकडीका लागि युवालाई अरु देशमा पठाउने चलन यो सदीमा अस्वीकार्य, अपाच्य र लज्जाजनक भएको उल्लेख गर्दै विज्ञप्तिमा सोही कारणले गोरखा भर्ती खारेजीको माग उठाउँदै आएको स्मरण गरिएको छ । विप्लवले राज्यलाई युवाका लागि देशमै रोजगारीका अवसर सिर्जना गर्न र युवालाई स्वदेशमै काम गर्नसमेत आग्रह गरेका छन् ।
