असार १३ गते २०७६

ताजा समाचार

असार १३ गते २०७६

कुष्ठरोगका कारण ३० वर्षदेखि जङ्गलमा बसेका सुनारी अव घरमा



कुष्ठरोग भएपछि विगत ३० वर्षदेखि जङ्गलमा बस्दै आएका पाल्पाका एक वृद्ध अहिले घर फर्किएका छन् ।

निस्दी–४ मित्यालका जसवीर सुनारी कुष्ठरोग लागेका कारण गाउँदेखि करीब ७०० मिटर टाढा जङ्गलमा बस्दै आएका सुनारी अहिले घरमा फर्केका हुन् ।

सुनारीको विषयमा विभिन्न सञ्चारमाध्यममा समाचार प्रकाशन तथा प्रसारण भएपछि स्थानीय सरकारको पहलमा उहाँलाई घर फर्काइएको छ । गाउँपालिकाका जनप्रतिनिधि, राजनीतिक दल, समाजसेवी, स्वास्थ्यकर्मीको टोलीले उहाँलाई घरमा फर्काएको गाउँपालिकाका अध्यक्ष मुक्तबहादुर सारुमगरले बताए ।

कुष्ठरोग लागेको थाहा पाएपछि विसं २०४० मा गाउँलेले गाउँमा कुष्ठरोग फैलिने डरले गाउँदेखि टाढा भिरालो जग्गा बाँसघारी नजिकै पठाएका थिए । उमेरले करीब ८० वर्ष पुगेका वृद्ध सुनारीले आफू बिरामी भएपछि गाउँलेहरुले आफूलाई हेला गर्ने गरेको स्मरण गरे पनि अहिले घरमा बस्दा खुसी लागेको बताए ।

अविवाहित सुनारीले भाइका छोराबुहारीले माया गरेर पहिलेदेखि नै घरमा बोलाउँदा पनि सबैले हेला गर्ने डरले नआएको बताए । यसअघि कहिलेकाहीँ गाउँमा हुने विवाह तथा चाडपर्वमा घर आएपनि खरको छानो र खरले नै बारेको छाप्रोमा बस्दै बस्ने गरेका थिए तर अहिले भने भाईबुहारीसंग बसेका छन् ।