ताजा समाचार

जेठ १२ गते २०७६

कृष्ण सेन इच्छुकका चर्चित २ कविता

जेल

म पर्खालभित्र छु
तिमी पर्खालबाहिर छौ
म पहराभित्र छु, तिमी पहराबाहिर छौ
म यातना–गृहमा छु
तिमी खुल्ला शिविरमा छौ
सिकारीले बाँधेको छाँद होस्
अथवा त्यो उसको फाँद होस्
के फरक पर्‍यो र?
मित्र, अर्काको मुठ्ठीभित्र पराधीन जिन्दगी
जहाँ काटनु परे पनि त्यो जेल हुन्छ।
जहाँ जीवन बन्धनहरूभित्र कैद हुन्छ
जहाँ सुन्दर सपना सधैँ अवैध हुन्छ
जहाँ मुक्त आकाङ्क्षाहरू बन्देज हुन्छन्
जहाँ हार्दिक भावहरूमा ठेस लाग्छ
अनि जहाँ बासी हावा बहने दुर्गन्धमा पनि
निर्धक्क सास फेर्न प्रतिबन्ध हुन्छ
बन्दुकको पहरा होस्
अथवा त्यो कानुनको घेरा होस्
के फरक पर्‍यो र?
मित्र, भयभीत परिवेशमा त्रसित जिन्दगी
जहाँ बाँच्नु परे पनि त्यो जेल हुन्छ।

जहाँ बेला–कुबेला रमन घुमिरहन्छ
जहाँ कारण–अकारण साइरन बजिरहन्छ
सडकमाथि बेलगाम घोडाको टापजस्तै
जहाँ चर्को आवाज गरी मार्च–पास चलिरहन्छ
अनि जहाँ मौसम बेमौसम बारुदहरू गर्जेर
सधैँ रगतको झरी परिरहन्छ
पर्खालभित्र होस्
अथवा त्यो पर्खालबाहिर होस्
के फरक पर्‍यो र?
मित्र, सधैँ छातीमा चाँदमारी थापेको जिन्दगी
जहाँ गुजार्नु परे पनि त्यो जेल हुन्छ।

उही दिन सधैँ, उही रात सधैँ
उही बिहान र साँझ साथ छ
उही स्वप्नभङ्ग विवश जिन्दगी
उही गतिहीन समय साल छ
निकासबिनाको बन्द तालजस्तै
जहाँ गन्दा समाजसाथ अँधेरो बास छ
कुनै अनाम देश होस्
अथवा त्यो प्रिय स्वदेश होस्
के फरक पर्‍यो र?
मित्र, उत्पीडित समाजमा पददलित जिन्दगी
जहाँ बिताउनु परे पनि त्यो जेल हुन्छ।

हामी भने त्यही गीत गाइरहन्छौं

हाम्रा स्वरहरुमा प्रतिवन्ध लगाउंदै
हाम्रा ओठहरुमा ताल्चा लगाउंदै
तिमी भन्छौ— गाउन त गाउ
तर यो गीत नगाउ
हामी भने त्यही गीत गाइरहन्छौं ।
हाम्रा विचारहरुमा प्रतिवन्ध लगाउंदै
हाम्रा हातहरुमा हत्कडी पहि¥याउंदै
तिमी भन्छौं — लेख्न त लेख
तर यो गीत नलेख
हामी भने त्यही गीत लेखिरहन्छौं ।
हाम्रा आस्थाहरुमा प्रतिवन्ध लगाउंदै
हाम्रा खट्टाहरुमा नेल भिराउंदै
तिमी भन्छौं— हिंड्न त हिंड
तर यो वाटो नहिंड
हामी भने त्यही वाटो हिंडीरहन्छौं
ओ शासक—प्रशासकहरु
अस्वीकार्य छ हामीलाई
तिम्रा निरंकुश आदेशहरु
तिमी जतिसुकै हुकुम र फरमानहरु जारी गर
तिमी जति सुकै जुलुम र उत्पीडनहरु शुरु गर
सक्छौ भने हाम्रा चेतनाहरुमा प्रतिवन्ध लगाउ
र,
सत्यलाई कैद गर
तर ओ तानाशाहहरु
तिम्रा बर्बर स्वेच्छाचारका बिरुद्ध
हामी भने निरन्तर आवाज उठाईरहन्छौं ।
उठाईरहन्छौं हामी तिम्रा विरुद्ध संघर्षका हातहरु
कसिरहन्छांै हामी तिम्रा विरुद्ध विद्रोहका मुठ्ठीहरु
ओ अत्याचारका पहरेदारहरु
अन्तिम जीत हाम्रै हो
तिम्रो हारमाथी विजयको झण्डा गाड्दै
हामी भने अथक र अविचल
अन्तिम युद्ध लडिरहन्छौं