नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ ले कास्की क्षेत्र नम्बर–२ को नेतृत्व लिन स्व. पर्यटनमन्त्री रवीन्द्र अधिकारीकी पत्नी विद्या भट्टराई (अधिकारी) सक्षम र उपयुक्त उम्मेद्वार हुनसक्ने बताएका छन् ।
प्रेस संगठन कास्कीले पोखरामा आयोजना गरेको पत्रकार सम्मेलनमा बोल्दै अध्यक्ष दाहालले विद्यालाई कास्की २ मा उम्मेद्वार बनाउन सकिने संकेत दिएका छन् । उनले पार्टीमा औपचारिक छलफल भएको नभए पनि पार्टीको स्थानीय संगठन र सबै सरोकारवालाको समन्वयमा उपयुक्त निर्णयले लिइने बताएका छन् ।
सञ्चारमाध्यमले पार्टीका नेता वामदेव गौतमको नाम चर्चामा ल्याए पनि रवीन्द्रकै परिवारबाट उम्मेद्वार उठाउन सकिने र यो न्यायसंगत पनि हुने बताएका छन् । ‘कास्की–२ मा उपनिर्वाचनबारे पार्टीमा औपचारिक रुपमा कुरा भइसकेको छैन’, उनले भने, ‘सञ्चारमाध्यममा वामदेवजीको सन्दर्भ पनि आएको सुनियो । उहाँले आफू नउठ्ने भनेर सबैलाई स्पष्ट पारिसक्नु भएको छ, वामदेवजीबारे पार्टीमा कुनै चर्चा चलेको छैन ।’
प्रचण्डले रवीन्द्रको परिवार पनि राजनीतिक भएकाले त्यहींबाटै उम्मेद्वार उठाउन सकिने बताएका हुन् । ‘कास्की जिल्लाका साथीहरुले पनि उचित उम्मेद्वारको नाम सिफारिस गर्नुहोला । परिवारको सदस्यबाटै जाँदा उपयुक्त हुन सक्छ’, दाहालले थपे, ‘उहाँको परिवार पनि राजनीतिक पृष्ठभूमिको हो । नेतृत्व गर्न सक्ने उहाँकै जीवन संगिनी पनि हुनुहुन्छ, विद्याजी । यी सबै कुरा विचार गरेर पार्टीले उपयुक्त निर्णय लिनेछ ।’






