ताजा समाचार

माघ १५ गते २०७५

क्यान इन्फोटेक पूर्व सन्ध्यामा दृष्टिविहीनलाई कम्युटर तालिम

दृष्टिविहीनका लागि पोखरामा कम्प्युटर शिक्षा तालिम सुरु भएको छ । कम्प्युटर एसोसिएसन नेपाल (क्यान) महासंघ कास्की शाखाको आयोजना र ओम डेभलपमेन्ट बैंकको सहयोगमा तालिम आयोजना गरिएको हो ।

फागुन १८ देखि २४ गतेसम्म पोखरामा आयोजना हुने ‘भायानेट क्यान इन्फोटेक–२०१९ इन एसोसिएसन विथ आइएमइपे’को पूर्व सन्ध्यामा तालिम सुरु भएको हो । कम्प्युटर शिक्षा तालिमको मंगलबार ओम डेभलपमेन्ट बैंकका प्रमुख कार्यकारी अधिकृत विश्वमोहन अधिकारीले उद्घाटन गरे । उनले सामाजिक उत्तरदायित्व बहन गर्ने क्रममा दृष्टिविहीनका लागि आयोजित कम्प्युटर शिक्षा तालिममा सहकार्य गरेको बताए । ‘प्रतिस्पर्धाको समयमा सूचना तथा प्रविधिको ज्ञान अनिवार्य भएको हुँदा दृष्टिविहीनहरुका लागि कम्प्युटर शिक्षा तालिम आयोजना गर्नु निकै राम्रो काम हो,’ उनले भने ।

क्यानका गण्डकी प्रदेश अध्यक्ष चिन्तामणि बास्तोलाले हरेक वर्ष क्यानले रचनात्मक कार्यक्रम गर्दै आएको र आगामी दिनमा पनि यस्ता कार्यक्रमलाई निरन्तरता दिनुपर्ने धारणा राखे । नेत्रहीन संघ कास्की अध्यक्ष लक्ष्मण सुवेदीले औपचारिक शिक्षासँगै कम्प्युटरको ज्ञान अनिवार्य भएको बताए ।
पोखराको नयाँबजारस्थित प्रदर्शनी केन्द्रमा हुने इन्फोटेकको तयारी तीव्र बनाइएको क्यान कास्की अध्यक्ष युवराज पौडेलले जानकारी दिए । ‘क्यान इन्फोटेकको पूर्व सन्ध्यामा दृष्टिविहीनलाई कम्प्युटर शिक्षा प्रदान गरेर रचनात्मक काम गर्न लागेका छौं,’ उनले भने । अघिल्लो वर्ष क्यानले गृहिणीलाई कम्प्युटर शिक्षा दिएको थियो ।

क्यान कास्की सदस्य शवी शेरचनको संयोजकत्वमा तालिम आयोजना गरिएको हो । क्यान कास्की अध्यक्ष युवराज पौडेलकोे अध्यक्षतामा आयोजित कार्यक्रममा नेपाल राष्ट्रिय अपांग महासंघ गण्डकी प्रदेश अध्यक्ष खोमराज शर्मा, क्यान कास्कीका सचिव विकास भुर्तेल लगायतले बोलेका थिए ।

इन्फोटेकमा बृहत सूचना प्रविधि प्रदर्शनी, प्रदेशस्तरको टाइपिङ प्रतियोगिता, आइटी क्विच कन्टेस्ट, कम्प्युटर तथा ल्यापटप निःशुल्क मर्मत, ल्यापटप एक्सचेन्ज अफर, आइसिटी क्षेत्रमा स्थानीय स्तरबाट गरिएका उत्पादनको प्रदर्शनी तथा अन्य आइसिटीसँग सम्बन्धित नवीनतम गतिविधि प्रदर्शनी, मोबाइल गेमिङ, वैज्ञानिक आइसिटी उपकरण प्रदर्शनी एवं नवीनतम प्रविधिका मोबाइलको प्रदर्शनी एवं बिक्री वितरण गरिने सचिव विकास भुर्तेलले जानकारी दिए । क्यान इन्फोटेकसँगै सिटी रेवान पोखराको आयोजनामा सिटी रेवान महोत्सव तथा फुड फेस्टिबल पनि हुनेछ ।