संक्रान्तिमा सिस्नु हानाहान, मन मिले लगनगाँठो

परापूर्वकालदेखि जाजरकोटका गाउँगाउँमा सिस्नु हानाहान गरी माघे सङ्क्रान्ति मनाइन्छ । यसपालि पनि यो पर्व सुरु भएको छ । चेली, बुहारीले टाढा टाढाबाट माइती घरमा गएर मीठो, मसिनो खाने चलनसमेत छ ।

मङ्गलबार बिहानैदेखि जिल्लाको पूर्वी क्षेत्रको नलगाड नगरपालिका, बारेकोट गाउँपालिकामा सिस्नु हानाहान गरेर माघे सङ्क्रान्ति मनाउन टाढाटाढाबाट पाहुना पुगिसकेको पञ्च भयार माध्यमिक विद्यालय जिकुवाका शिक्षक वीरबहादुर खत्रीले बताए ।


विवाह गर्न मिल्ने नाता पर्नेहरूबीच बढी सिस्नु हानाहान गर्ने चलन छ ।

यो परम्परा कहिलेबाट सुरु भयो भन्ने यकीन नभए पनि केटाकेटीले रमाइलोका लागि खेल्दाखेल्दै परम्पराको रूपमा स्थापित भएको हुनसक्ने नलगाड नगरपालिका नगरप्रमुख टेकबहादुर रावलले बताए । आजको दिन सिस्नु नछुने र नखेल्ने व्यक्ति सँुगुर हुने जनविश्वास छ । विवाह गर्न मिल्ने नाता पर्नेहरूबीच बढी सिस्नु हानाहान गर्ने चलन छ ।

सिस्नु खेल्न टाढाटाढाबाट नलगाड नगरपापालिका का १ देखि १० वडामा पुग्ने गर्दछन् । सिस्नु खेल्दाखेल्दै विवाहसमेत हुने गरेको छ । गाउँगाउँमा बाक्लो घर भएका ठाउँमा जम्मा भएर सिस्नु खेल्ने काम हुने नगरप्रमुख रावलले बताए । रुकुमको आठविसकोटमा पनि सिस्नु खेल्ने काम हुने गर्दछ ।

तल्लो डोल्पामा बिहानै उठेर (ढकुल्लो) खानेकुरा गाउँगाउँमा बाँड्नुका साथै (ठेलोवेजो) अर्थात गाउँभरीका यूवाहरू जम्म भएर बन्दुकबाट तारो हानेर सङ्क्रान्ति बनाउने काम हुने मुट्केचुला गाउँपालिका–९ सर्मीका शिक्षक हस्तबहादुर बुढाले बताए । जसले तारो हानेर जित्छ उसैलाइ केही रकम दिने गरिँदै आएको छ ।