कफिनका ४ खुट्टा हुन्छन् : डा तारा कोइराला

‘धूमपान, रक्तचाप, मधुमेह र कोलेस्ट्रोल कफिनका ४ खुट्टा हुन् । यीबाट टाढै रहनुस् ,’ मधुमेह, थाइराइड तथा हर्माेन रोग विशेषज्ञ डा तारा कोइराला भन्छन् । धूमपान, रक्तचाप, मधुमेह र कोलेस्ट्रोलले धेरै रोग निम्त्याउने र उचित उपचार नगरे ज्यानै जान सक्ने जोखिम हुन्छ । यसैलाई सांकेतिक रुपमा डा. कोइरालाले यसरी प्रष्ट्याएका हुन् ।


स्याङ्जा हस्पटल प्रालिको आयोजनामा पुतलीबजार १ चौकीमा शनिबार भएको स्वास्थ्य शिविरमा उनले यस्तो बताएका हुन् । डा कोइरालाले रोग लागे÷नलागेको पत्ता लगाउन र रोगको अवस्था थाहा पाउन राम्रा ल्याब जरुरी हुने उल्लेख गरे ।

थाइराइडका विभिन्न प्रकार र अवस्थाबारे प्रकाश पार्दै उनले सबै थाइराइडमा औषधी खानैपर्छ भन्ने भ्रम नपाल्न आग्रह गरे । इन्सुलिन बन्दै नबन्दा, कम बन्दा र बनेको इन्सुलिनले पनि काम नगर्दा मधुमेह हुन्छ ।


डा. कोइरालाले जीवनशैली, खानपान र वंशाणुगत कारणले पनि मधुमेह हुनसक्ने औंल्याए । उनले भने, ‘बेलैमा पत्ता लगाएर सावधानी र उपचार गरे जीवन लामो हुन्छ, हेलचेक्र्याई गरे आँखा बिग्रिन्छ, मृगौला खराब हुन्छ, अनेक असर हुन्छन् ।’


पोखरा, सभागृहचोकमा रहेको युनाइटेड रेफरेन्स ल्याबोरेटरी प्रालि(युआरएल)को प्राविधिक सहयोगमा भएको शिविरमा अन्य सबै प्रकारका रक्त परीक्षणमा पनि ५० प्रतिशत छुट दिइएको थियो । शिविरमा ३ सय २ जनाको सित्तैमा थाइराइड, रगतमा हुने खराब बोसो र मधुमेहसम्बन्धी रक्त परीक्षण गरिएको छ ।


कार्यक्रममा सांसद नारायणप्रसाद मरासिनीले स्वास्थ्य, शिक्षा, रोजगारीको संविधानले ग्यारेन्टी गरे पनि अझै राज्यले यसको ग्यारेन्टी गर्न सक्ने अवस्था नरहेको बताए । उनले खानपान, जीवनशैली र शारीरिक व्यायममा ध्यान दिँदै रोग लागिहाले पनि नडराउन बरु उचित उपचार गर्न आग्रह गरे । उनले भने, ‘मलाई मधुमेह छ, हृदयघात पनि भयो । ध्यान दिएँ र पो बाचें, नदिएको भए अहिलेसम्म रहन्नथें ।’


युआरएलका प्रबन्ध निर्देशक ठाकुरप्रसाद पन्तले गण्डकी प्रदेशका बासिन्दालाई सर्वसुलभ र गुणस्तरीय सेवा दिनु युआरएलको लक्ष्य भएको बताए । उनले भने, ‘समस्या हुने सबैसँग पैसा हुँदैन । रोग लुकाउँदा, उपचार नगर्दा ज्यानै जान सक्छ । यसैलाई मनन गरी हामी शिविरहरु आयोजना गरिरहेका छौं । ’ युआरएलले विभिन्न संघ, संस्थासँगको सहकार्यमा आयोजना गरेको यो ५९ औं शिविर हो ।


स्याङ्जा हस्पिटल प्रालिका सञ्चालक डा. वसन्त पंगेनीले स्वस्थ मानिसलाई रोग लाग्न नदिन र रोग लागिसकेकालाई उचित उपचारका लागि यस्ता कार्यक्रम सहयोगी हुने बताए । कार्यक्रम सञ्चालन विक्रम परियारले गरेका थिए ।