सामाजिक अध्ययन मञ्च कास्कीको अध्यक्षमा गोविन्द काफ्ले सर्वसम्मत भएका छन् । शनिबार सम्पन्न १५ औं साधारण सभा तथा आठौं अधिवेशनबाट काफ्लेसँगै उपाध्यक्षमा नारायणी शर्मा, सचिवमा तिलक काफ्ले, कोषाध्यक्ष बृहस्पति लम्साल र सहसचिव केशवप्रसाद भट्टराई सर्बसम्मत निर्वाचित भएका छन् ।
सदस्यमा डिलकुमारी पौडेल, दीपक सापकोटा, हेम सुवेदी, रामप्रसाद ढकाल, बबिता सारु थापा, दयासागर पौडेल र विचित्र पौडेल चुनिए । कार्यक्रममा गण्डकी प्रज्ञा प्रतिष्ठानका कुलपति सूर्य खड्का ‘बिखर्ची’ले संस्कार र संस्कृतिहरु लोपुन्मुख अवस्थामा रहेका बेला सामाजिक अध्ययन अध्यापन गराउने शिक्षकहरुले विद्यार्थीलाई जागरूप बनाई संरक्षण र प्रवर्धनका लागि योगदान गर्नुपर्नेमा जोड दिए ।
मञ्चले सामाजिक अध्ययन विषयमा देखिएका अन्योल हटाई अध्यापनमा एकरुपता ल्याई शिक्षक र विद्यार्थी केन्द्रित कार्यक्रम आयोजना गर्दै आएको निवर्तमान अध्यक्ष दिनेश अर्यालले बताए । त्यस अवसरमा नेपाली संस्कार, संस्कृति, भाषा, साहित्य, शिक्षा तथा सामाजिक गतिविधिमा योगदान गर्ने डा गेहेन्द्रमान उदास ‘पोखरेली’ लाई सम्मान गरिएको थियो ।
कार्यक्रममा प्रतिवेदन लेखन प्रतियोगितामा प्रथम, दोस्रो, तेस्रो र सान्त्वना स्थान प्राप्त गर्ने विद्यार्थीहरुलाई पुरस्कार वितरण गरियो । संस्थाका संस्थापक कृष्णप्रसाद ढकाल संयोजक र संस्थापकहरु सन्तोष गुरुङ र टेकनाथ पौडेल रहेको निर्वाचन मण्डलले नयाँ समिति चयनका लागि सहजीकरण गरेको थियो ।
समाचार, विचार बाडौं, सेयर गरौं । केही अनलाइनले हाम्रा सामग्री हुबहु र तोडमोड गरी प्रयोग गरेको पाइएकाले गैरकानुनी कार्य नगर्न अनुरोध छ ।
