पोखरेली साहित्यकार प्रकट पगेनी ‘शिव’को निधन भएको छ । निमोनियाका कारण स्वास्थ्यमा गम्भीर समस्या देखिएपछि मणिपाल शिक्षण अस्पतालमा उपचारका क्रममा उनको निधन भएको हो ।
मंगलबार दिउँसो ४ बजे चिकित्सकले उनलाई मृत घोषणा गरेका हुन् । पछिल्लो समय जन्मस्थान रुपा गाउँपालिकाको देउरालीमा फार्म र कजेट चलाउने तयारी गरेका पगेनी गीत, गजल, कविता लेख्थे, त्यतिमात्र होइन उनी राम्रा कलाकार पनि थिए ।
बुधबार बिहान सवा १२ बजे मणिपाल शिक्षण अस्पतालबाट शवयात्रासहित उनको फूलबारीको सेतीघाटमा उनको अन्त्येष्टि गरिने भएको छ । उनको परिवारमा श्रीमती, छोरा र छोरी छन् ।
