एजी इन्टरटेन्मेन्टको आयोजना र ग्रेस इन्टरनेसनल माइग्रेसनको संयोजनमा पोखरामा एक दिने सिजन २ ‘द रोड अहेड’ कार्यक्रम गरिने भएको छ । विद्यार्थी तथा युवाहरुलाई जीवनको मार्गदर्शनका लागि ‘द रोड अहेड’ कार्यक्रम गर्न लागिएको हो ।
यही फागुन २० गते पोखराको न्यु रोडमा रहेको सिटी स्क्यायरमा हुने कार्यक्रममा चर्चित कलाकार, खेलाडी र सञ्चारकर्मीले प्रशिक्षण दिने ग्रेस इन्टरनेशनल पोखरा शाखाका सञ्चालक प्रदिप कुमार लम्सालले जानकारी दिए । शैक्षिक यात्राको रुपमा विभिन्न क्षेत्रमा चर्चित विज्ञ तथा कलाकारहरुले आफ्नो अनुभव र परामर्श दिने छन् ।कार्यक्रममा चर्चित हास्यकलाकार मनोज गजुरेल, क्रिकेटर दीपेन्द्रसिंह ऐरी, मिस नेपाल सरिशा श्रेष्ठ, टेलिभिजनकर्मी आरके धिताल, एन्ड्रयु पौडेल, लगायतका चर्चित व्यक्तिहरु सहभागी हुने लम्सालको भनाई छ । पछिल्लो समय युवा र विद्यार्थीहरु रोजगार र शैक्षिक गन्तव्यको खोजीमा भौतारी हुँदा उनीहरुलाई परामर्श दिन ‘द रोड अहेड’ कार्यक्रमले महत्वपूर्ण भूमिका खेल्ने उहाँको भनाई छ ।
लम्सालले भने–‘हामीहरुले विद्यार्थीलाई विदेश जानु पर्छ भनेर प्रेरित गर्नका लागि यो कार्यक्रम आयोजना गरेको होइनौँ, नेपालमा पनि अवसर छ, यही पनि केही गर्न सकिन्छ भन्ने प्रेरणा दिनका लागि यो कार्यक्रम गर्न थालेका हौँ, कार्यक्रममा आउनेलाई विभिन्न व्यक्तिहरुले संभावना देखाउने खालका प्रशिक्षण दिने छन् ।
ग्रेस इन्टरनेशनल पोखरा शाखाले बिगत १० वर्षदेखि पोखरामा स्थापना भई स्वदेश तथा विदेश पढ्ने विद्यार्थीहरुका लागि परामर्श दिँदै आएको छ ।
