फेवा नहर व्यवस्थित गर्न आग्रह

गण्डकी प्रदेशका अर्थमन्त्री रामजीप्रसाद बराल ‘जीवन’समक्ष पोखराको फेवा नहरलाई व्यबस्थापन गर्न पोखरेलीले माग गरेका छन् । पोखरा १७ को जनजागरण टोल विकास संस्थाले शनिबार मन्त्री बराललाई बधाई ज्ञापन गर्ने क्रममा पोखरेलीले फेवा नहरका कारण हरेक वर्ष मान्छेसमेत बगाउने त, केहीको मृत्युसमेत भएकाले फेवा नहर व्यवस्थापन गर्न माग गरेका हुन् ।

पोखरा १७ का वडाध्यक्ष तीर्थराज अधिकारीले पोखरा पार्दीस्थित राम मन्दिरबाट पावर हाउस खेल मैदान जाने १२ सय मिटर सडक स्तरोन्नति गर्न माग गरे । पावर हाउसमा करिब ५ सय रोपनी जग्गामध्ये हाल साहसिक खेल गतिविधि सञ्चालन गर्न सकिने गरी हाल १ सय ५२ रोपनी जग्गा प्रयोग गर्न मिल्ने अवस्थामा रहेको उनले जनाए ।

संस्थाका उपाध्यक्ष कमलप्रसाद बरालले द्वन्द्वकालमा हत्केलामा ज्यान राखेर जनयुद्धमा होमिएको योद्धा आज मन्त्री भएर आफूहरुले सममान गर्न पाउन निकै खुसी व्यक्त गरे ।

उनले जनताको भावना अनुसार काम गर्न मन्त्री बराललाई आग्रह गरे । जनजागरण आमा समूहका अध्यक्ष नन्दकुमारी गुरुङ, पोखरा १७ का वडा सदस्य राधिका शाही, सचिव शिव बराल लगायतले मन्त्री बराललाई बधाई ज्ञापन गर्दै कार्यकालको सफलताको कामना गरे ।

पोखरा १७ धेरै क्षेत्रका मानिसको बसोबास भएको मिश्रित बस्ती भएकाले सम्भावनायुक्त पोखरा १७ लाई अपेक्षा गरे अनुरुप आफ्नो क्षेत्रबाट पहल गर्ने मन्त्री बरालले जनाए । आगामी दिनमा रचनात्मक सल्लाह सुझावको अपेक्षा गरिएको उनले जनाए । राज्य पक्षबाट एक पैसा नहँुदा पनि सामुदायिक भवन बनाएकोमा मन्त्री बरालले धन्यवाद दिँदै आगामी दिनमा संस्थाको बृहत विकासमा थप सहयोग गर्ने जनाए ।