दोस्रो पटक मुख्यमन्त्री बने पृथ्वीसुब्बा

गण्डकी प्रदेशको मुख्यमन्त्रीमा पुनः पृथ्वीसुब्बा गुरुङ नियुक्त भएका छन्।

विपक्षी दलको दाबी नपुगेको भन्दै गुरुङलाई प्रदेश प्रमुख सीताकुमारी पौडेलले बुधबार साँझ मुख्यमन्त्री नियुक्त गरेकी हुन्। गुरूङ संविधानको धारा १६८ ३ अनुसार ठूलो दलको हैसियतले गुरूङ मुख्यमन्त्रीमा नियुक्त भएका हुन्। गुरूङ अहिले कोरोना संक्रमित छन्।

यता, गण्डकीका ४ विपक्षी दलले नयाँ सरकार गठन प्रक्रियाप्रति आपत्ति जनाएका छन् । नेपाली कांग्रेस, नेकपा माओवादी केन्द्र, राष्ट्रिय जनमोर्चा र जनता समाजवादी पार्टीले विज्ञप्ति जारी गर्दै मुख्यमन्त्रीमा पुनः पृथ्वीसुब्बा गुरुङलाई नियुक्त गर्नु प्रदेश प्रमुखको पूर्वनियोजित निर्णय भएको आरोप लगाएका हु्न् ।

चार दलले कांग्रेसका कृष्णचन्द्र नेपाली पोखरेललाई मुख्यमन्त्रीमा नियुक्त गरियोस् भन्ने दावी पेश गरे गरेका थिए ।

प्रस्तावक दलहरुको कागजात नपुगे माग्नुपर्ने वा आवश्यक छानबिन गर्नुपर्नेमा प्रदेश प्रमुखले संविधानको घोर अपमान गरेको विपक्षीको आरोप छ ।

गुरुङले २६ गते मुख्यमन्त्रीबाट राजीनामा दिएका थिए । प्रदेशसभामा २७ गते अविश्वास प्रस्तावमाथि मतदान हुने कार्यसूची थियो ।

राजीनामापछि प्रदेश प्रमुख पौडेलले बहुमत दाबी गर्न दलहरुलाई ३ दिनको समयावधि दिएकी थिइन् । चैत अन्तिम साता माओवादी केन्द्रले सरकारलाई दिएको समर्थन फिर्ता लिएपछि प्रदेश प्रमुख परिवर्तन गरिएको थियो ।

अब मुख्यमन्त्री गुरुङले एक महिनाभित्र विश्वासको मत लिनेछन् । उनले विश्वासको मत नपाएमा कुनै सांसदले बहुमतको दाबी गरी सरकार बनाउन सक्छ । त्यसो पनि हुन नसके प्रदेशमा उपनिर्वाचन हुनेछ ।