फागुन २३ बाट पुरानै स्वरुपमा फर्केको नेकपा माओवादी केन्द्रले पार्टीको नाम फेर्ने तयारी गरेको छ।
पार्टीको नाम फेर्ने विषयमा अध्यक्ष पुष्पकमल दाहाल प्रचण्डसहित स्थायी समिति अधिकांश सदस्य सहमत भएका छन् । बुधबार बसेको स्थायी समिति बैठकमा पार्टीको नाम फेर्ने विषयमा छलफल भएको हो ।
बैठकमा नेपाली कम्युनिस्ट पार्टी, एकीकृत नेपाल कम्युनिस्ट पार्टी वा नेपाल कम्युनिस्ट पार्टीपछि केही फुर्काे जोड्नेबारे छलफल भइरहेको छ ।
अदालतले एमाले र माओवादी केन्द्रलाई विभाजनअघिकै अवस्थामा पुर्याएपछि पछिल्लो पुस्ता, बौद्धिक वर्ग र अन्य कम्युनिस्ट पार्टीका सदस्यलाई आकर्षित गर्न नाम फेर्न लागिएको हो ।
‘अन्य पार्टीमा रहेका, स्वतन्त्र भएर बसेकाहरुलाई माओवादी बन्न नपर्ने गरी आफ्नो पार्टीमा आउने वातावरण तयार गर्न पनि नाम परिवर्तन गरेर जानुपर्ने सुझाव आएको’ स्थायी समिति सदस्य कृष्णबहादुर महराले बताए ।
प्रचण्ड नेतृत्वको नेकपा माओवादी केन्द्र अनेकौँ टुटफुटको शृंखलापछि यो अवस्थामा आएको हो ।
