१३ वर्षीया बालिकाको अश्लिल भिडियो बनाएको आरोपमा पक्राउ

१३ वर्षीया बालिकाको अश्लिल भिडियो बनाएर सामाजिक सञ्जालमा पठाउने एक युवालाई प्रहरीको साइवर ब्यूरोले पक्राउ गरेको छ।

ब्यूरोको टोलीले तनहुँ भानु नगरपालिकाकी १३ वर्षीया बालिकाको फेसबुकको नक्कली आइडी बनाएर आफन्तलाई अश्लिल भिडियो पठाउने तनहुँका सविनराज मिश्रलाई शुक्रबार पक्राउ गरेको हो।

ब्यूरोका प्रवक्ता, प्रहरी वरिष्ठ उपरीक्षक नविन्द अर्यालले १३ वर्षीया एक बालिकाको फोटो प्रयोग गरी नक्कली फेसबुक खोलेर अश्लिल फोटो तथा सन्देश बालिकाको दिदी तथा आफन्तलाई पठाउने कार्यमा संलग्न रहेकाले मिश्रलाई पक्राउ गरिएको जानकारी दिए।

पक्राउ परेका मिश्र यसअघि पनि विद्युतीय कारोवार ऐन, २०६३ को कसुरमा जिल्ला अदालत काठमाडौँबाट एक लाख तिरेर धरौटीमा छुटेका व्यक्ति भएको ब्यूरोले जनाएको छ।

पक्राउ परेका मिश्रलाई काठमाडौँ जिल्ला अदालतबाट सात दिनको म्याद थप गरी अनुसन्धान भइरहेको प्रवक्ता अर्यालले जानकारी दिए। रासस