नेपाल राष्ट्रिय शिक्षक संगठन कास्कीले आजदेखि विद्यार्थीसँग शिक्षक संगठन भन्ने उद्घोषका साथ राष्ट्रिय अनलाइन वक्तृत्वकला प्रतियोगिता सुरु गरेको छ ।
गण्डकी प्रदेशका मुख्यमन्त्री पृथ्वीसुब्बा गुरुङले प्रतियोगिता उद्घाटन गर्दै अहिलेको अवस्थामा वैकल्पिक उपाय अपनाएर विद्यालय सञ्चालन विचार राखे । उनले शिक्षक संगठनले अनलाइनमार्फत् विविध कार्यक्रम गरेर आफ्नो जिम्मेवारी निर्वाह गरेकोमा खुसी लागेको बताए । प्रविधिमैत्री विद्यालय, अनलाइन कक्षा र शिक्षणका वैकल्पिक उपायहरु सञ्चालन गर्नका लागि प्रदेश सरकारले गर्नुपर्ने सहयोग गर्ने प्रतिबद्धता जनाए ।
नेपाल राष्ट्रिय शिक्षक संगठनका केन्द्रीय अध्यक्ष लक्ष्मण शर्माले शिक्षकहरु प्रविधिमा जोडिनुपर्ने अवस्थामा जुममार्फत् पहिलो चरणमा शिक्षकलाई अनलाइन क्लासका तालिम र अहिले नेपालभरका विद्यार्थीका लागि वक्तृत्वकला प्रतियोगिता गर्नु राम्रो कार्य भएको बताए । इसिडी शिक्षक र विद्यालय कर्मचारीको तलब अत्यन्त कम भएको र वृद्धि नभएकोमा दुख व्यक्त गर्दै उनले वृद्धिका लागि शिक्षक संगठनले हरतरहबाट प्रयास गरिरहेको सुनाए ।
पोखरा महानगरपालिकाका मेयर मानबहादुर जिसीले संगठनले गरेको कार्य सह्रानीय भएको उल्लेख गरे । नेपाल पत्रकार महासंघ कास्की अध्यक्ष दीपेन्द्र श्रेष्ठले कोरोनाको कहर र जारी लकडाउनको विषम परिस्थितिमा पनि आफ्नो जिम्मेवार भूमिका निर्वाह गर्दै वैकल्पिक उपाय अन्तर्गत विद्यार्थीका लागि अनलाइन वक्तृत्वकला प्रतियोगिता गर्नु प्रशंसनीय भएको बताए ।
नेपाल राष्ट्रिय शिक्षक संगठन गण्डकी प्रदेशका अध्यक्ष राम पोख्रेलले अब शिक्षक र शिक्षा क्षेत्र नयाँ युगमा प्रवेश गरेको तर्क गरे । वक्तृत्वकला प्रतियोगितामा देशभरबाट ९७ विद्यार्थी सहभागी छन् ।
उद्घाटन सत्रमा प्रतियोगीहरु आकृति पौडेल, आर्यन झा, आशिष बस्याल, काशिष काफ्ले, आस्था अनिरञ्जित बस्ताकोटी र अविनास पौडेलले वक्तृत्व प्रस्तुत गरेका थिए । विभिन्न चरण गरी १३ दिनसम्म चल्ने वक्तृत्वकला प्रतियोगिताका निर्णायक मण्डलमा त्रिभुवन विश्वविद्यालयका प्रा.डा. यदुनन्दन उपाध्याय, त्रिभुवन विश्वविद्यालयका सहप्रा.डा. पुण्यप्रसाद शर्मा र पृथ्वीनारायण क्याक्पसका प्राध्यापक डोलराज अर्याल छन् ।
प्रतियोगितामा प्रथम हुनेले २५ हजार, दोस्रोले १५ हजार र तेस्रो हुनेले १० हजार पाउने छन् । ७ जनालाई जनही २ हजार र सहभागी सबैलाई प्रमाणपत्र प्रदान गरिने कार्यक्रममा संयोजक तीर्थराज ढकालले जानकारी दिए ।
कार्यक्रममा संगठन इलामका अध्यक्ष प्रकाश खनाल, कुल्याब्स डट कमका अधिप पौडेल, शिक्षा विकास निर्देशनालयका प्रमुख तिलक सिलवाल, शिक्षा विकास तथा समन्वय एकाई कास्की प्रमुख नारायण सुवेदी, संगठन उपाध्यक्ष वसुन्धरा पौडेल र संगठन कास्की उपाध्यक्ष हर्कबहादुर लामिछानेले बोलेका थिए । कार्यक्रम संगठनका कास्की जिल्ला अध्यक्ष रोमहर्षण पौडेलको अध्यक्षतामा भएको थियो ।
