चैत्र २८ गते २०७६

ताजा समाचार

चैत्र २८ गते २०७६

माउण्ट अन्नपूर्ण स्कुलमा अनलाइन कक्षा सञ्चालन



विश्वभर माहामारीको रुपमा फैलिएको कोरोना भाइरस (कोभिड–१९) को सन्त्रास नेपालमा अझ धेरै लम्बिने सम्भावनासँगै माउण्ट अन्नपूर्ण मा.वि. नदीपूर ३ कास्कीले विद्यार्थीहरुलाई अनलाइन कक्षाहरु सञ्चालन गर्दै आएको छ । “विद्यालय प्रशासनसँगको सहकार्य तथा विद्यालयका +२ संयोजक कृष्ण लम्साल, प्रशासक प्रदिप पोख्रेल र विज्ञान विषय शिक्षक तथा होस्टल इन्चार्ज पुरन श्रीसको संयोजकत्वमा दैनिक रुपमा विद्यार्थीहरुले घरबाटै आफ्ना शिक्षकहरु मार्फत विषयगत अध्ययन गर्ने सुवर्ण अवसर प्राप्त गरेका छन्,” विद्यालयका प्राचार्य प्रदिप कुमार लम्सालले जानाकारी दिए ।

नयाँ शैक्षिक सत्रमा पनि ‘लकडाउन’ यसै गरी अनिश्चित रुपमा लम्बिँदै गएमा नयाँ शैक्षिक सत्र अन्तर्गतका कक्षाहरु पनि अनलााइन मार्फत नै सञ्चालन गर्न विद्यालय तयारी अवस्थामा रहेको पनि उनले जानाकारी दिए । विशेष गरी (माध्यमिक शिक्षा परीक्षा) एस.ई.ई. तथा कक्षा ११ र १२ का विद्यार्थीहरुको अन्तिम परीक्षालाई लक्षित गरी चलाइएको यो कार्यक्रममा इन्टरनेटको पहुँच पुगेका तमाम अभिभावक तथा विद्यार्थीहरु प्रत्यक्ष लाभान्वित भएको पाइएको छ ।

कोरोना भाइरस (कोभिड–१९) को सन्त्राससँगै नेपाल सरकारले घोषणा गरेको ‘लकडाउन’का कारणले सम्पूर्ण विद्यार्थीहरु घर–घरमै छन् । ‘लकडाउन’को चपेटामा परेका विद्यार्थीहरुलाई लक्षित गर्दै विद्यालय परिवारले ZOOM Application मार्फत अनलाइनमा जोडिन सम्पूर्ण विद्यार्थीलाई आग्रह पनि गरेको छ । यो Application को उच्चतम् प्रयोग गरी शिक्षक विद्यार्थीबीच आवश्यक अन्तक्र्रिया र परामर्श गर्न सकिने कुरा उल्लेख छ । ZOOM Application मार्फत अनलाइनमा उपस्थित हुन नसक्ने विद्यार्थीलाई विद्यालय प्रशासनका तर्फबाट प्राचार्य प्रदिप कुमार लम्साल र निर्देशक अशोक कुमार शाहीले टेलिफोनमार्फत पनि आवश्यक सरसल्लाह र सुझाव अभिभावक तथा विद्यार्थीहरुलाई दिइरहेको जानाकारी दिए ।

कोरोना भाइरसको विषम परिस्थितिलाई मध्यनजर गर्दै विद्यालयले चालेको यो कदमप्रति सम्बन्धित अभिभावक, विद्यार्थी तथा सरोकारवालाहरुले अत्यन्तै खुशी व्यक्त गरेको कुरा विद्यालयक व्यवस्थापन समितिका अध्यक्ष गिरी प्रसाद गुरुङले प्रकाश पारे । प्रविधिमैत्री सिकाइ अहिलेको समयको आवश्यकता रहेको र यसले विद्यार्थीहरुलाई थप सक्रिय र सिकाइप्रति उत्साहित बनाएको कुरा विद्यालयका +२ संयोजक कृष्ण लम्सालले जानाकारी दिए ।