मुस्ताङको वारागुङ मुक्तिक्षेत्र गाउपालिकाले अतिविपन्न,असहाय तथा दैनिक ज्याला मजदुरी गरेर घर गुजारा चलाउनेका लागि आईतबार देखि घरदैलोमै पुगेर राहत वितरण गर्न सुरु गरेको छ । पालिकाले पहिलो चरणमा वारागुङ–४ को कागबेनी ,तिरी र पाक्लिङ गरी ३ गाउका ५१ घरधुरीलाई राहत वितरण गरेको हो ।
विश्व व्यापी नराम्ररी फैलिएको नोवल कोरोना भाईरस (कोभिड–१९) कारण सरकारले १२ दिन अघि मुलुक लक डाउन गरेको थियो । लक डाउनको असरले समस्यामा परेका पालिका भित्रका मजदुरको समस्या सुल्झाउन स्थानीय जनप्रतिनिधि राहत प्याकेज लिएर घरदैलोमै पुगेको वारागुङ मुक्तिक्षेत्रका सूचना अधिकारी सूर्य तिमिल्सिनाले जानकारी दिए ।
कोरोना रोकथामका लागि सरकारले गराएको लक डाउनले आहत बनेका अतिविपन्न,असहाय तथा दैनिक ज्याला मजदुरी गर्नेलाई राहत उपलब्ध गराउन गण्डकी प्रदेश सरकारले स्थानीय तहलाई ५ लाख दिएको थियो । पालिका भित्रको मजदुरको संख्या हेरेर प्रदेशको उक्त बजेट माथि आवश्यक बजेट थपिने गरी राहत वितरण गर्ने योजना रहेको अध्यक्ष फेञ्चोक छेप्तेन गुरुङले जानकारी दिए । उनका अनुसार लक डाउनबाट पीडित बनेका परिवारलाई खाद्यान्न ,चाउचाउ ,तेल,नुन,दाल लगायतका सामाग्री वितरण गरिएको हो ।
राहत वितरणमा अध्यक्ष फेञ्चोक छेप्तेन गुरु‘ ,उपाध्यक्ष ढिकी गुरुङ र वडाध्यक्ष तेन्जिन नाम्गेल गुरुङ लगायत पालिकाका कर्मचारी घरदैलोमा पुगेका थिए । उपाध्यक्ष डिकी गुरुङले विपन्न परिवार र मजुदरको संख्या पहिचान गरी ४ समुह बनाएर राहत वितरण भएको सुनाईन् । उनले पालिकाको ५ वडा मध्ये वडा–४ र ५ को नामावली संकलन भएको र १,२,३ को नामावली आउन बाकी रहेको जानकारी दिईन् ।
पालिकाले सोमबार वडा –५ मा राहत वितरण गर्ने जनाईएको छ ।
वारागुङ–४ मा राहत वितरण गर्दै जनप्रतिनिधि । तस्विर ःसूर्य तिमिल्सिना ।
