चैत्र ८ गते २०७६

ताजा समाचार

चैत्र ८ गते २०७६

संकटसँग जुध्न आधा घरभाडा छुट



कोरोना भाइरस (कोभिड–१९) बाट व्यापार व्यवसाय प्रभावित बनेपछि पोखराको १ व्यापारिक मलले व्यवसायीलाई राहत दिन भाडामा ५० प्रतिशत छुट दिने घोषणा गरेको छ ।

पोखराको मुख्य व्यापारिक केन्द्र चिप्लेढुंगामा अवस्थित पोखरा ट्रेड मल एन्ड हाउजिङ प्रालिले मलमा रहेका ५ सय ३ सटरमा सञ्चालित २ सय ५२ व्यापारिक प्रतिष्ठानलाई चैत महिनाको भाडामा आधा छुट दिने भएको हो । २०७२ असोज २४ गतेदेखि सञ्चालनमा आएको गण्डकी प्रदेशकै सबैभन्दा ठूलो सो मलले कोरोनाका कारणले व्यापार व्यवसाय चौपट भएको परिस्थितिलाई मध्यनजर गरी मलभित्रका व्यवसायीलाई केही मात्रामा भए पनि राहत दिनका लागि भाडामा छुट दिने निर्णय गरिएको शनिबार आयोजित पत्रकार सम्मेलनमा गण्डकी प्रदेशसभा सदस्यसमेत रहेका मलका अध्यक्ष विन्दुकुमार थापाले जानकारी दिए ।

मलले सो निर्णयबाट व्यवसायीलाई २५ लाख छुट हुनेछ । कोरोनाको त्रास लम्बिएको अवस्थामा छुट दिने योजनालाई निरन्तरता दिइने अध्यक्ष थापाले बताए । ‘व्यवसायमा नाफामात्र जोडिदैन, सेवाको भावना पनि जोडिएको हुन्छ । विषम परिस्थितिका कारणले व्यवसायी मर्कामा परेका कारणले व्यवसायीबाटै सञ्चालित संस्था भएकाले भाडामा छुट दिएर राहत प्रदान गर्ने निर्णण गरेका हौं,’ उनले भने ।
देशभरका उद्योग, व्यवसाय तथा व्यापारिक प्रतिष्ठान कोरोनाका कारणबाट व्यवसाय खस्किरहेको विषम परिस्थितिमा बैंक तथा वित्तीय संस्थाले समेत ब्याजदरमा कम्तीमा ५० प्रतिशत घटाउने व्यवस्था मिलाउनसमेत मलले माग गरेको छ । कोरोनाबाट सहजगता अपनाउन मलभित्र प्रवेश गर्ने ग्राहक, शुभेच्छुक, व्यवसायी तथा कर्मचारीलाई स्यानिटाइजर प्रयोग गर्न लगाइएको तथा मलको प्रवेशद्वारमा स्वास्थ्य सहायताकक्ष स्थापना गरी ग्राहकको शरीरको तापक्रम परीक्षण गरेर सही अवस्थाको जानकारी दिने गरिएको प्रबन्ध निर्देशक मीनराज काफ्लेले बताए । सरकारको अनुरोधबमोजिम मलभित्र सञ्चालनमा रहेको सिनेमा हल तथा जिम हल अनिश्चितकालका लागि बन्द गरिएको छ ।