ताजा समाचार

पौष २६ गते २०७६

अफिन गण्डकी अध्यक्षमा फेरि अशोक

निजी अस्पतालको छाता संगठन एसोसिएसन अफ प्राइभेट हेल्थ इन्टिच्यूट अफ नेपाल गण्डकी प्रदेशको शनिबार भएको प्रथम अधिवेसनले अशोक पालिखेको अध्यक्षतामा ११ सदस्यीय कार्यसमिति निर्वाचित गरेको छ ।

समितिको उपाध्यक्ष्यमा डा. गिरीधारी शर्मा, सचिवमा ऋषि खतिवडा र कोषाध्यक्षमा डा पूजन शर्मा छन् । समितिका सदस्यमा कपिल पोख्रेल, विश्व घिमिरे, तुलबहादुर राना, डा सन्दिप गोर्खाली, डा छविलाल थापा, शोभाकान्त पौडेल र सुशील पौडेल छन् । सल्लाहकारमा डा पदमबहादुर खड्का, डा भरतबहादुर खत्री, डा प्रेमबहादुर पुन र डा ऋषिराम ढकाल छन् ।

नवगठित समितिले गण्डकी प्रदेशका ११ वटै जिल्लाको प्रतिनिधित्व गर्ने सचिव ऋषि खतिवडाले बताए ।

यसअघि कार्यक्रममा अफिनका केन्द्रीय वरिष्ठ उपाध्यक्ष कुमार थापाले अफिन गण्डकीले निजी अस्पतालको हकहितका लागि उदाहरणीय काम गर्न सक्नुपर्ने धारणा राखे । अहिले पनि निजी अस्पताल र यसमा काम गर्ने जनशक्तिमा निकै समस्या रहेको बताउदै थापाले ती समस्यालाई नवगठित समितिको नेतृत्वमा समाधानको प्रयास हुनुपर्ने सुझाव दिए ।

अफिनका केन्द्रीय उपाध्यक्ष हरिप्रसाद रिजालले सरकारले निजी क्षेत्रसंग सम्बन्धित नीति, नियमलाई अझै व्यवस्थित गरेर लैजानुपर्ने बताए । पोखरा महानगरपालिकाका स्वास्थ्य महाशाखा प्रमुख हेमन्त शर्माले समग्र स्वास्थ्य सेवाको विकासका लागि निजी संस्थाले पनि सरकारी निकायसंग हातेमालो गरेर अगाडि बढ्नुपर्ने उल्लेख गरे ।

नवनिर्वाचित अध्यक्ष अशोक पालिखेले निजी अस्पतालका संचालकहरु संगठित हुनुनपर्ने आवश्यकता औंल्याए । उनले प्रदेशका सबै अस्पताल र तिनका सञ्चालकलाई अफिन गण्डकीमा आबद्ध हुन आग्रहसमेत गरे ।