निर्वतमान सभामुख कृष्णबहादुर महरा असोज २८ गतेसम्म प्रहरी हिरासतमै रहने भएका छन् ।दशैं बिदाका कारण अदालत २६ गतेसम्म बन्द रहने र २७ गते पूर्वप्रधानन्यायाधीश केशवप्रसाद उपाध्यायको निधन भएकोले २७ गते शोक बिदा भएकोले २८ गतेमात्रै खुल्ने भएपछि महरा प्रहरी हिरासतमै रहने भएका हुन ।
प्रहरीका अनुसार अदालतमा खुलेकै दिन महरालाई काठमाडौं जिल्ला अदालतमा उपस्थित गराइनेछ । अदालतमा उपस्थित गराएपछि अनुसन्धान गर्नको लागि म्याद थप्न अनुमति माग्नेछ ।
महरालाई महानगरीय प्रहरी वृत सिहदरबारमा राखिएको छ । महराको आइतबार राति नै वीर अस्पतालमा स्वास्थ्य परीक्षणसमेत गरिएको छ ।
महरामाथी संसद सचिवालयमा कार्यरत महिला कर्मचारी रोशनी शाहीले आफूमाथि जबरजस्ती करणी गर्न खोजेको भन्दै शुक्रबार वानेश्वर प्रहरी वृतमा उजुरी दिएकी थिइन ।
रोशनीकै जाहेरीका आधारमा महरा आइतबार सरकारी निवासबाटै पक्राउ परेका थिए । असोज १२ गते महरा रक्सीको बोतल बोकेर शाहीको तीनकुनेस्थित डेरामा पुगेको पीडितको दाबी थियो ।
शाहीले महराले आफूमाथी बलात्कार गरेको भन्दै त्यही राती प्रहरीमा खबर गरेकी थिइन । तर पछि शाही आफैंले बलात्कार प्रयासमा उजुरी दिएकी हुन् ।
प्रहरीले शाहीको डेराबाट महराले ल्याएको भनिएको रक्सीको बोतल, चस्मा र जुत्ताको तलुवालगायत सामाग्री बरामद गरेको थियो । ती सामाग्रीको फरेन्सिक जाँचका लागि ल्याबमा पठाइसकेको प्रहरी अधिकारी बताउँछ ।






