सिंगापुरको तरंग : प्रचण्डकै सल्लाहमा गएका हुन् गौतम र पौडेल ?

उपचारत प्रधानमन्त्री एवं नेकपा अध्यक्ष केपी शर्मा ओलीलाई भेट्न पार्टी महासचिव विष्णु पौडेल मङ्गलबार सिङ्गापुर पुगे । प्रधानमन्त्री ओलीले नै बोलाएपछि महासचिव पौडेल सिङ्गापुर पुगेका हुन् । 

महासचिव पौडेल सिङ्गापुर उडेको अर्को दिन सङ्गठन विभाग प्रमुख वामदेव गौतम पनि प्रधानमन्त्री ओलीलाई भेट्न त्यसतर्फ लागे । पहिला महासचिव पौडेल र गौतम एकै दिन सिङ्गापुर जाने योजना थियो । तर गौतमले मङ्गलबार सिङ्गापुर जाने कार्यक्रम अन्तिम समयमा रोके । 

लगत्तै प्रधानमन्त्री ओलीले गौतमलाई फोन गरेर ‘बोलाएपछि’ बुधबार नेता गौतम सिङ्गापुर गएका थिए । पछिल्लो समय प्रधानमन्त्री ओली र नेता गौतमबीच सम्बन्ध सुधार भएको छ र गौतमले पार्टीमा महत्त्वपूर्ण जिम्मेवारी पाएका छन् । 

सिङ्गापुरको नेसनल युनिभर्सिटी हस्पिटलमा उपचार गराइरहनुभएका प्रधानमन्त्रीको प्लाज्माफेरेसिस प्रक्रियाबाट बुधबार सातौँ चरणको उपचार भएको छ । चिकित्सकका अनुसार प्लाज्माफेरेसिस प्रक्रियामार्फत रगतमा रहेका एन्टिबडीजस्ता हानिकारक तत्व हटाइन्छ । फलोअपमा प्रधानमन्त्री भदौ ५ गते सिङ्गापुर गएका हुन् । 

तर, बुधबार नै उनको उपचार करिब-करिब सकिएको थियो । उपचार सकिनै लाग्दा प्रधानमन्त्री एवं नेकपा अध्यक्ष ओलीले पार्टी महासचिव पौडेल र सङ्गठन विभाग प्रमुख गौतमलाई किन सिङ्गापुर बोलाए ? नेकपाभित्र अहिले यो प्रश्न उठेको छ ।

कतिपयले यसलाई प्रधानमन्त्री एवं पार्टी अध्यक्ष ओलीले सिङ्गापुरमा आवश्यक परामर्श गर्ने र नेपाल फर्केर महत्त्वपूर्ण निर्णय लिने कदमका रूपमा हेरेका छन् । 

गौतम र पौडेल दुवै नेता कार्यकारी अध्यक्षको हैसियत पाएका पुष्पकमल दाहाल प्रचण्डसँगको परामर्श गरेर सिङ्गापुर गएकाले ओली–प्रचण्डबीच लगातार कुराकानी भएको पनि भनिएको छ । यहीबीचमा प्रचण्डको अध्यक्षतामा बसेको नेकपाको सचिवालय वैठकले महत्त्वपूर्ण निर्णय लिएको छ । अन्तरपार्टी निर्देशिका–२ जारी गरेको छ ।

साउन १८ गते सिङ्गापुरको उपचार गराई सुधार भएपछि साउन २७ गते स्वदेश फर्केका थिए । त्यसपछि प्रधानमन्त्री एवं पार्टी अध्यक्ष ओलीले सरकार र पार्टीभित्र महत्त्वपूर्ण निर्णय लिएका थिए । ओली सिङ्गापुरबाट फर्केपछि नेकपामा १५ महिनादेखि रोकिएका सङ्गठनात्मक एकताले गति लिएको थियो । 

त्यसैले पनि अहिले गौतम र पौडेल सिङ्गापुर जानुलाई ओलीले परामर्शका लागि बोलाएको र फर्केपछि महत्त्वपूर्ण निर्णय लिने आधारका रूपमा हेरेका छन् । यद्यपि ओलीले गौतम र पौडेलसँग के कुरा गरे भन्ने यकिन छैन । सिङ्गापुर जाँदा दुवै नेताले प्रधानमन्त्रीलाई भेट्न जान लागेको मात्र बताएका थिए । 

एकातिर पार्टी नेताहरुसँग परामर्श गरेका प्रधानमन्त्री ओलीले अर्कोतर्फ यही बीचमा सिङ्गापुरबाटै ‘भिडियो कन्फ्ररेन्स’ मार्फत मन्त्रीहरुसँग छलफल गरेका छन् अर्थात प्रधानमन्त्री ओलीले सिङ्गापुरमा रहँदा पनि सरकारको काममाथि चासो राखेका छन् ।

यद्यपि प्रधानमन्त्रीले राष्ट्रिय सुरक्षा र गोपनियतामा ध्यान नदिई ‘भिडियो कन्फ्ररेन्स’बाट मन्त्रिपरिषद्को बैठक बोलाएको भन्दै आलोचना पनि भयो । त्यसपछि सरकारले मन्त्रिपषिद्को बैठक नभई प्रधानमन्त्रीले मन्त्रीहरुसँग छलफल मात्रै गरेको रूपमा व्याख्या गरेको थियो ।

सचिवालयका केही नेता र ओली निकट स्थायी कमिटीका एक नेताका अनुसार प्रधानमन्त्री ओलीले सिङ्गापुरबाट फर्केपछि तीन महत्त्वपूर्ण निर्णय लिन सक्ने बताउँछन् ।