दरखाने बेलामा पार्वती चितामा

शनिवार राति अवेरसम्म जाजरकोटको तिमिले टोलमा तीज गीतमा नाचको रमझम थियो । त्यस गाउँकी ३२ बर्षीया पार्वती ओलीलाई पनि त्यो रमझमले छोएको थियो ।  

भेरी नगरपालिका वडा नम्वर २ तिमिले टोलमा भएको तीज गीतको रमझमले पार्वतीका श्रीमान बलबहादुर ओली एकातिर उनी र दुई छोरीको सुताई अर्कोतिर हुन पुग्यो । 

आइतवार दरखाने दिन माइत जाने तयारीमा रहेकी पार्वती र उनको परिवारमा नसोचेकै घटना घट्यो, सुतेको केही घण्टा पछि ।  

माथीबाट पहिरो आयो र घरसँगै आफूहरु बगेको पत्तै पाएनन उनीहरुले । आइतबार रातको साढे १ बजेतिर पहिरोको गडाङगुडुङ्ग सुनेर मात्र बलबहादुरले श्रीमती र छोरीहरु बगेको थाह पाए ।

जाजरकोट जिल्ला प्रहरी प्रमुख डिएसपी श्याम खत्री भन्छन्,‘३२ बर्षीया पार्वती ओली, उनकी ९ वर्षीया  छोरी मोतीकला र ३ वर्षीया अर्की छोरी धनसराको एकै साथ ज्यान गएको हो ।’ माइत जाने तयारीमा रहेकी उनको दुखद मृत्यु भयो,’ उनले दुख प्रकट गर्दै भने  ।

शव पोष्टमार्टम गरी दाहसंस्कार गर्न अबेर भएका कारण उनीहरुको शव दाहसंस्कार गरी  साँझपख काजकिरियाको कुनो बार्दै गरेको स्थानीयले बताए ।

यति बेला दरखाने साँझको रमझम त्यस परिवारमा मात्रै नभएर  सिङ्गो तिमिले टोल मै रुवावासीमा परिणत भएको छ ।