ताजा समाचार

श्रावण १८ गते २०७६

‘छात्रवृत्ति वितरणमा एकलौटी, मनोमानी, नातावाद र कृपावाद !’

पोखरा महानगरपालिकाले गरेको संस्थागत विद्यालय छात्रवृत्ति वितरणप्रति नेपाली कांग्रेसका तर्फबाट निर्वाचित ११ जना वडा अध्यक्षहरूले असहमति प्रकट गरेका छन् ।

दलको नेता तथा सचेतक रामराज लामिछानेद्वारा जारी गरेको विज्ञप्तिमा पोखरा महानरगर पालिकाको शिक्षा नियमावली २०७४ र संस्थागत विद्यालय छनौट निर्देशिका विपरित छात्रवृत्ति वितरण प्रक्रिया एकलौटी, मनोमानी, नातावाद कृपावादबाट वितरण गरिएको भन्दै विरोध गरिएको छ । कांग्रेसको तर्फबाट वडा नं. २, ३, ४, ६, ९, १०, ११, १२, २३, २७ र ३२ मा वडा अध्यक्षमा निर्वाचित भएका थिए ।

‘शिक्षा नियमावली २०७४ को छात्रवृत्ति सम्बन्धी व्यवस्थामा महानगर शिक्षा समितिले छात्रवृत्ति निर्धारण समिति मार्फत वडा शिक्षा समितिसंग समन्वय गरी लैंगिक समावेशिताको आधारमा गरिव विपन्न सिमान्तकृत, पिछडिएको वर्ग, लक्षित समुदाय भित्रका विद्यार्थी र जेहेन्दार जस्ता आरक्षण बमोजिमको छात्रवृत्ति प्रदान गर्ने व्यवस्था छ’, सचेतक लामिछानेद्वारा जारी गरिएको विज्ञप्तिमा भनिएको छ, ‘तर यी प्रावधानलाई मिचेर महानगर शिक्षा समितिले वेवास्ता गरी एकलौटी ढंगले विपन्न, सीमान्तकृत, पिछडिएको वर्ग लक्षित समुदायका वर्गलाई उपेक्षागरी आफ्नालाई मात्रै प्रथामिकतामा राखि वितरण गरिएको छात्रवृत्ति प्रति हाम्रो पूर्ण असहमत रहेको छ ।’

‘संस्थागत विद्यालय छात्रवृत्ति वितरण कार्यविधि २०७५ मा नगर शिक्षा समितिका संयोजक नै छात्रवृत्ति छनौट समिति संयोजक रहने प्रावधान हुदाँहदै हामीसँग कुनै सल्लाह नगरि एकलौटी ढंगले समिति बनाइएको छ । त्यो नै गलत छ’, सचेतक लामिछानेले भने, ‘महानगरका हरेक गतिविधिमा काँग्रेसका तर्फबाट निर्वाचित ११ वडा अध्यक्षहरूसँग कुनै सल्लाह नै नगरी २ तिहाइको दम्भ देखाउने काम भएको छ । यसप्रति हाम्रो आपत्ति रहेको छ ।’

नियतवस बहुमतको मिचाई गरी छात्रवृत्ति वितरणको विरोध गर्दै तत्काल आवश्यक छानविन गरि यसलाई सच्याउनका लागि विज्ञप्ति मार्फत जोडदार माग गरिएको छ ।