प्रहरीलाई पचासः सामान भन्सार पार

गत सोमबार विहान ११ बजे वीरगन्ज घन्टाघरदेखि सीमापारि रक्सौलसम्म पुग्ने टेम्पोमा एक महिलाले अन्दाजी १५ केजी समान भएको एउटा बोरा राखेर केहिबेर बेपत्ता भइन् । सिट क्षमता अनुसार यात्रु भरिए ।

टेम्पोमा सामान हालेर बेपत्ता भएकी महिलालाई सबैले कुर्न थाले । १० मिनेटपछि महिला आइन् र टेम्पोमा बसिन् । उनको हातमा ५०–५० दरका केही थान नेपाली नोट थिए । उनको नाम सुगिया देवी रहेछ । चालकले टेम्पो गुडाउनासाथ उनले बोरालाई सिट मुनि लुकाइन् । बोरामा के छ भनी सोध्दा मरिच भएको बताइन् ।

घन्टाघरदेखि गुडेको टेम्पो रक्सौलसम्म पुग्दा ठाउँठाउँमा प्रहरीले लाठी बजाउँदै सिट मुनि के छ भनेर सोधे । सुगिया देवीले प्रहरीको हातमा ५०–५० का नोट थमाउँदै टेम्पो चालकलाई अगाडि बढ्न निर्देशन दिइन् । टेम्पो भन्सार नाकामा पुगेर रोकियो । त्यहाँ पनि एक प्रहरीले टेम्पोमा लाठीले हान्दै सुगियाको अनुहार हेर्यो । सुगियाले टेम्पोको झ्यालबाट ५० को नोट थमाइन् । रक्सौल पुग्दा उनले पाँचजना प्रहरीलाई ५०–५० रुपैयाँ दिएकै भरमा १५ केजी मरिच पास गराउन सफल भइन् ।