डुङ्गा दुर्घटना हुँदा १३० भन्दा बढी शरणार्थी बेपत्ता

एजेन्सी– उत्तरपश्चिमी अफ्रिकी मुलुक जिबोटीको सामुद्रिक तटमा दुई डुङ्गा दुर्घटनाग्रस्त हुँदा कम्तिमा १३० आप्रवासी शरणार्थी बेपत्ता भएका छन् । 

अन्तर्राष्ट्रिय आप्रवासी संगठन (आइओएमले) बुधबार जारी गरेकाे प्रेस विज्ञप्तिमा भनेको छ, ‘जिबोटीको ओबोक क्षेत्र नजीकै मङ्गलबार बिहान भएका डुङ्गा दुर्घटनामा १३० जनाभन्दा बढी आप्रवासी शरणार्थी डुबेर बेपत्ता भएका छन् ।’

अहिलेसम्म दुई जनालाई जीवितै र तीन महिलाको शव भेटिएकाे आइओएमले बताएको छ । 

बेपत्ता यात्रुहरूको खोजी अझै जारी रहेको भए पनि उनीहरू पानीमा बेपत्ता भएको करिब २४ घण्टा भएकोले जीवितै उद्धार गर्नसकिने सम्भावना न्युन रहेको विज्ञप्तिमा उल्लेख छ । यद्यपि बेपत्ता भएका नागरिक कुन देशका थिए भन्ने बारेमा पनि आइओएमले जनाएको छैन । 

गरीब इथियोपियाली नागरिकले राम्रो आर्थिक अवसरको खोजीमा उक्त बाटो गरेर अरबेली प्रायद्वीपमा छिर्ने गरेका छन् । रेड सी पार गर्ने क्रममा डुबेर वा खाने पानीको अभावमा वर्षेनी हजारौ मानिसले ज्यान गुमाउने गरेका छन् । 

पछिल्ला बर्षमा इथियोपियाली सरकारले रेड सीको मार्ग प्रयोग गरेर यात्रा गर्दा जीवन खतरामा पर्नसक्ने भनी स्थानीय छापा तथा प्रशारण सञ्चारमाध्यममा दिने गरेका सचेतनामुलक विज्ञापनलाई हटाएका छन् ।