भालुको आक्रमणमा परी दुई जना घाइते भएका छन् । घाइते हुनेमा बाजुराको खप्तड छेडेदह गाउँपालिका २ का ४० वर्षीय बमबहादुर धामी र सोही गाउँपालिका–३ की १८ वर्षीया शान्ति बुढा रहेको जिल्ला प्रहरी कार्यालय बाजुराका प्रहरी नायब निरीक्षक लोकेन्द्रसिंह गुरुङले जानकारी दिए ।
शुक्रबार दिउँसो गाउँ नजिकैको जंगलमा दाउराघाँस गर्न गएका बेला घाइते दुवै जनालाई दुई भालुले आक्रमण गरेको बताएका छन् । आक्रमणमा घाइते भएका बमबहादुर र शान्तिले आफु बाँच्नको लागि भालुसँग प्रतिकार गर्दा दुवै भालुको मृत्यु भएको बताए । घाइते दुवैको अहिले स्थानीय स्वास्थ्यचौकीमा उपचार भइरहेको छ ।
यसअघि गत मङ्सिर ४ गते खप्तड छेडेदह गाउँपालिका–४ खातीगाउँमा पनि भालुको आक्रमणबाट २ महिला गम्भीर घाइते भएका थिए ।
