‘दि भ्वाइस अफ नेपाल’ विजेता सिडी विजय अधिकारीले नेपालको अर्को गायन रियालिटी सो ‘नेपाल आइडल’ को दोस्रो संस्करणका अन्तिम प्रतिस्पर्धी पोखराका बिक्रम बराललाई जिताउन अपिल गरेका छन् ।
उनले पोखरामै आएर आफूलाई भोट गरी जिताउने प्रशंसकलाई धन्यवाद दिदैं नेपाल आइडलका प्रतिस्पर्धी बिक्रम बराललाई पनि जिताउन आग्रह गरेका हुन् । मंगलबार पोखरा आइपुगेका सिडीले बुधबार बिक्रम बराल जिताउ अभियान समितिले आयोजना गरेको पत्रकार सम्मेलनमा बिक्रमका लागि भोट मागेका हुन् ।
सिडीले आफूलाई जिताउन गठन गरिएको सहयोग समितिको माध्यम बिक्रमका लागि ५० हजार रुपैयाँसमेत हस्तान्तरण गरे । ‘हामी पोखरामा एउटै स्कुल कलेजमा पढेका थियौ’, उनले भने, ‘बिक्रम बराल एक राम्रो प्रतिभा भएका गायक हुन् ।’
नेपाल आइडलको फाइनल शुक्रबार हुँदै छ । बिक्रमलाई जिताउन भोटिङ अन्तर्गत जजमार्फत ३३ प्रतिशत, रेस्पेक्ट एन्ड राइजमार्फत ३३ प्रतिशत र मोबाइल एसएमएसमार्फत ३३ प्रतिशत भोटको आवश्यकता रहेको बिक्रम बराल जिताउ अभियान समिति महासचिव मनकुमार श्रेष्ठले बताए ।
बिक्रमका बुवा कलिगढ हुन् । पोखरामा मजदूरी गरी परिवार चलाउने भएकाले सहयोग गरिदिन उनले सबैमा अपील गरेका छन्
