नेपाल शैक्षिक परामर्श संघ (इक्यान) कास्कीले मंसिर २६ देखि २८ गतेसम्म आयोजना गर्ने इक्यान शैक्षिक मेलाका सबै स्टल बुकिङ भएका छन् ।
इक्यानले मंगलबार स्टल बुकिङ खुलाएको थियो । मेलामा राखिने ७० स्टल केही समयमा नै बुकिङ सकिएको इक्यान कास्की अध्यक्ष भुवन क्षेत्रीले बताए । ‘स्टल निकै सस्तो मूल्यमा उपलब्ध गराइएको छ,’ उनले भने ।
पेभेलियनमासहित मेलामा ७० वटा स्टल रहने स्टल व्यवस्थापन उपसमिति संयोजक नसीव क्षेत्रीले जानकारी दिए । उच्च शिक्षा अध्ययनका लागि विदेश जान चाहने विद्यार्थीलाई लक्षित गरी मेला आयोजना गरिएको सचिव रुद्रप्रसाद अर्यालले जानकारी दिए ।
