इरानमा बोइङ विमान दुर्घटना, विमानमा सवार सबैको मृत्यु

इरानमा बोइङ ७३७ युक्रेनी जहाज दुर्घटना हुँदा सवार सबैको मृत्यु भएको छ । बोइङ ७३७ इरानको राजधानी तेहरानको इमाम खोमेनी एयरपोर्टबाट युक्रेनको राजधानी किभ जाँदै थियो । 

उडान भरेको तीन मिनेटमै विमान दुर्घटना भएको थियो । जहाजमा १८० यात्रु सवार रहेको प्रारम्भिक सूचना दिइएको भए पनि पछिल्लो समय १६७ जना रहेको र सबैको मृत्यु भएको जनाइएको छ । 

यकिन तथ्यांक नआए पनि सवार सबैको ज्यान गएको बताइएको छ । उड्डयन विभागको एक टिम तुरुन्तै घटनास्थलमा गएको इरानी फोर्स न्यूज एजेन्सीले जनाएको छ । 

फ्लाइट राडार २४ वेबसाइट एयरपोर्टको तथ्यांकका अनुसार बोइङ ७३७–८०० विमानले स्थानीय समय अनुसार बुधबार बिहान ५ः१५ बजे उडान भरेको थियो । 

तर त्यो विमान ६ः१२ मा मात्र उडेको थियो । उडेको केही समयमै फ्लाइटले डेटा पठाउन छाडेको थियो । 

घटना रहस्यमयी
यो दुर्घटनाको घटना रहस्यमयी बनेको छ । इरानी संचारमाध्यमहरुले प्राविधिक गढबडी भनिरहेका छन् भने विदेशी संचारमाध्यमहरुले अमेरिका इरान तनावको रुप भएको हुन सक्ने आशंका गरेका छन् । 

एयरलाइन्सले अहिलेसम्म कुनै पनि बयान जारी गरेको छैन । 

यो दुर्घटना कसरी भयो भन्ने खुलेको छैन । अमेरिका र इरानबीच तनाव बढिरहँदा त्यसकै असर यो दुर्घटनामा परेको त हैन ? भन्ने प्रश्नसमेत उब्जिएको छ । 

मलेसिया एयरलाइन्सले भने यसै खतरालाई मुल्यांकन गर्दै इरानी एयर स्पेस भएर नउड्ने निर्णय गरेको छ ।