मुक्तिनाथ देखि कोरला सम्म पर्यटक ,मुस्ताङका होटल भरिभराउ


मुक्तिनाथ आएका पर्यटक कोरला सम्म
एसके थकाली
मुस्ताङ– धार्मिक तथा पर्यटकीय जिल्ला मुस्ताङमा यसवर्ष पनि दशैं सकिए लगत्तै आन्तरिक पर्यटकको घुईचो लागेको छ । बडा दशैं–तिहार ,नेपाल संम्वत तथा छडपर्वको अवसरमा घर विदामा फर्किएका नेपालीहरु कोरलानाका हेर्न ओईरिएका हुन् ।


मुस्ताङ र म्याग्दीको सीमाक्षेत्र स्थित घासा प्रहरी चौकीले दिएको जानकारी अनुसार दशैं पर्वको पछिल्लो दिन पछि शुक्रवार सम्ममा करिव ६ हजार पर्यटक मुस्ताङ भित्रिएको जनाईएको छ । घासां प्रहरी चौकीका ईञ्चार्ज नीमप्रसाद तिमिल्सिनाका अनुसार मुस्ताङ भित्रिने पर्यटकमा अधिकाँश स्वदेशी रहेका छन् ।


पछिल्लो २४ घण्टामा आन्तरिक पर्यटक २३ सय ५६ ,सार्क राष्ट्रका पर्यटक १ सय १५ र विदेशी पर्यटक १८ रहेको ईञ्चार्ज तिमिल्सिनाले बताए । यस्तै, दशैं लगत्तैको पछिल्लो २४ घण्टामा म्याग्दी हुँदै मुस्ताङमा ६ सय ५२ सवारी साधन भित्रिएका छन् । जसमा ३ सय ४१ मोटर साईकल ,बस १७,ट्रक १३ ,जीप १ सय ९० ट््याक्टर ३ ट््याक्सी २,पर्यटकीय जीप ८० र पर्यटकीय मोटरसाईकल ६ वटा रहेको प्रहरी चौकी घाँसाले जनाएको छ । शुक्रबार सम्म यसको दोब्बर सवारी भित्रिएको हो ।
दशैं लगत्तै युवा पुस्ताको मुख्य रोजाई बनेको हिमालपारी मुस्ताङमा पर्यटकीय चाप संगै यहाँका साना ठुलै सबै होटल तथा रेष्टुरेन्ट भरिभराउ छ । नेपालीहरुको मुख्य चाडपर्वको लामो बिदामा बसेका कर्मचारी,विदेशबाट नेपाल फर्किएका नेपाली ,विद्यालय र कलेजमा पढ्ने विद्यार्थी र बैंक तथा वित्तिय संस्थामा कार्यरत कर्मचारी ,व्यवसायी र पेशाकर्मीहरु मुस्ताङ ओईरिएका हुन् ।

मुस्ताङ भ्रमण गर्न आउने अधिकाँश युवापुस्ता रहेको प्रहरी ईञ्चार्ज नीमप्रसाद तिमिल्सिनाले बताए । पछिल्लो समय सामाजिक संञ्जाल प्रयोगकर्ता अत्यधिक बढेकाले पनि नेपाली पर्यटकमा घुमफिरको प्रभाव बढेको ईञ्चार्ज तिमिल्सिनाको भनाई छ । दशै पछि युवा पुस्ताको मुस्ताङ आगमन बढेको बताए ।


बुधबार देखि सदरमुकाम जोमसोम लगायत बेनी–जोमसोम–कोरला सडकमा संञ्चालित सबै होटलहरु पर्यटकले भरिएको एयरपोर्ट स्थित होटल ताजकी संञ्चालिका तृष्णा गौचन शेरचनले जानकारी दिईन् । उनका अनुसार अक्सर दशैपछि युवापुस्तामा मुस्ताङ घुमफिरको केन्द्र बनेको उल्लेख गरिन् ।
यस्तै, पोखरा देखि जोमसोम सम्म हवाई पर्यटक समेत बृद्धि भएको जोमसोम नागरिक उड््यन कार्यालयले जनाएको छ । कार्यालयका अनुसार असोज लगत्तै यहा संञ्चालन भएका समीट तथा तारा एयरलाईन्सले दैनिक १० वटा उडान समेत गरेको कार्यालय प्रमुख दिपक विकले जानकारी दिए । हवाई सेवा मार्फत मुस्ताङ आउनेमा भारतिय र विदेशी पर्यटक रहेको उनले बताए ।


भारतिय नाकाबन्दी पछि चर्चाको शिखरमा चुलिएको मुस्ताङको उत्तरी कोरलानाका अवलोकन गर्न आन्तरिक पर्यटक कोरलानाका सम्म पुग्ने गरेको पाईएको छ । सरकारले राष्ट्रिय गौरवको आयोजना अन्तर्गत सडक स्तरोन्नति गरेकाले उपल्लो मुस्ताङ पुग्न सहज भएको हो । उपल्लो मुस्ताङको फरक भुगोल ,प्राचिन गुम्बा अनि गुफाहरु र ऐतिहासिक तथा धार्मिक कला संस्कृतिका कारण उपल्लो मुस्ताङ भ्रमण गर्ने आन्तरिक तथा बाह्य पर्यटक बढेको अन्नपूर्ण संरक्षण क्षेत्र आयोजना एक्यापले जनाएको छ ।

यस्तै ,हिन्दु तथा बौद्ध धर्मालम्बीहरुको साझा तिर्थ स्थल मुक्तिनाथमा भारतिय प्रधानमन्त्री नरेन्द्र मोदीको भ्रमणपछि मुक्तिक्षेत्रको चर्चा अन्तराष्ट्रिय स्तरमा चुलिएको हो । यस्तै मुस्ताङमा सडक संञ्जाल जोडिए संगै फिल्म छायाङ्कनको क्रम समेत बढेको छ । तल्लो मुस्ताङ देखि उपल्लो मुस्ताङ सम्म २ दर्जन नेपाली चलचित्रको छायाङ्कन भईसकेको छ । चलचित्रको माध्यम र मुस्ताङ भ्रमण गरी फर्किएका पर्यटकले पर्यटन प्रर्वद्धनमा सघाउ पु¥याएपछि यहाको पर्यटन व्यवसाय बृद्धि भएको हो । मुस्ताङको परिवेशलाई समेट्दै दर्जनौ डकुमेन्टी फिल्म बनिसकेका छन् ।


धार्मिक किंवदन्ती अनुसार वारागुङ मुक्तिक्षेत्र गाउपालिकाको मुक्तिनाथ र कागबेनी श्राद्ध स्थल प्रसिद्ध छ । मुक्तिनाथको दर्शन तथा कोरलानाका अवलोकन गर्न आउने पर्यटकहरुले घरपझोङ –५ स्थित ढुम्बाताल जान छुटाउदैन । मुस्ताङको मनोरम प्राकृतिक सुन्दरता संग रमाउन र तस्विर खिचाउन पर्यटक लालायित हुने गर्छन् । यस समय मुस्ताङका स्याउ बगानमा स्याउ फलेका दृष्य समेत देख्न पाईन्छ ।
ढुम्बाताल संगै थासाङमा रहेको सेकुङ र टिटी ताल हेर्न उल्लेख्य रुपमा पर्यटक पुग्ने गरेको पाईएको छ ।


हाम्रो बारेमा
नेपालदुत पाठकसम्म समाचार, सूचना, विचार र मनोरञ्जन पुर्याउने डिजिटल दुत हो । संसारमा आविष्कार भएका नयाँ प्रविधि, विश्वका घटना क्रमदेखि नेपाली पुगेका ठाउँका गतिविधि पनि हाम्रा सरोकारका विषय हुन् । नेपालदुत मिडिया प्रालि पोखराबाट सञ्चालित यो समाचार पोर्टलले विचार, विश्लेषणमा सिमित नरही खोजी पत्रकारितालाई पनि बढाबा दिने लक्ष्य…
पूरा पढाैं