रसुवाको भोटेकोशीमा आएको विनाशकारी बाढीपछि नेपाल स्वास्थ्य व्यवसायी परिषद्ले स्वास्थ्यकर्मीलाई आपत्कालीन उद्धार तथा स्वास्थ्य सेवाका लागि तयारी अवस्थामा रहन आग्रह गरेको छ।
नेपाल स्वास्थ्य व्यवसायी परिषद्का अध्यक्ष शगुन पौडेलका अनुसार परिषद्ले २६ अगस्ट २०२६ मा आएको भोटेकोशी बाढीपछि दर्तावाला स्वास्थ्य व्यवसायीलाई आवश्यक परे मानवीय तथा स्वास्थ्य सेवामा परिचालन हुन तयार रहन सूचना जारी गरेको हो।
परिषद् स्वास्थ्य व्यवसायीको नियामक निकाय भएकाले प्रत्यक्ष रूपमा उद्धार तथा उपचार टोलीको नेतृत्व गर्नेभन्दा स्वास्थ्य जनशक्तिको तयारी, विवरण संकलन र आवश्यकताअनुसार परिचालनमा सहजीकरण गर्ने भूमिका रहेको अध्यक्ष पौडेलले बताए।
उनका अनुसार स्वास्थ्यकर्मीको वास्तविक परिचालन भने नेपाल सरकार, स्वास्थ्य तथा जनसंख्या मन्त्रालय, प्रदेश तथा स्थानीय स्वास्थ्य निकाय, र्यापिड रेस्पोन्स टिम (RRT), इमर्जेन्सी मेडिकल टिम (EMT) तथा सम्बन्धित स्वास्थ्य संस्थाको समन्वयमा भइरहेको छ। बाढी प्रभावित क्षेत्रमा आवश्यकताअनुसार स्वास्थ्यकर्मीले आफ्ना संस्था तथा तोकिएका संयन्त्रमार्फत मानवीय तथा चिकित्सकीय सेवा दिइरहेका छन्।
आपत्कालीन स्वास्थ्य जनशक्तिको डाटाबेस बनाइने
अध्यक्ष पौडेलले आगामी दिनमा परिषद्ले आपत्कालीन स्वास्थ्य जनशक्ति व्यवस्थापनलाई थप व्यवस्थित बनाउने बताए।
परिषद्ले स्वास्थ्यकर्मीको स्थान, पेशा, कार्यक्षेत्र, विशेषज्ञता र आपत्कालीन अवस्थामा उपलब्ध हुन सक्ने अवस्थासहितको अद्यावधिक आपत्कालीन स्वास्थ्य जनशक्ति डाटाबेस तयार गर्ने योजना बनाएको छ।
त्यस्तै, आपत्कालीन चिकित्सा, सघन उपचार, एनेस्थेसिया, शल्यक्रिया, ट्रमा केयर, मानसिक स्वास्थ्य, पुनर्स्थापना, जनस्वास्थ्य, प्रयोगशाला सेवा, संक्रमण रोकथाम तथा नियन्त्रण र महामारी विज्ञानलगायतका क्षेत्रमा विशेषज्ञता भएका स्वास्थ्यकर्मीको सीप नक्साङ्कन गरिने परिषद्ले जनाएको छ।
आवश्यक परेको अवस्थामा सरकार तथा सम्बन्धित संस्थासँगको समन्वयमा परिचालन गर्न सकिने स्वास्थ्यकर्मीको आपत्कालीन रोस्टर तयार गर्ने तयारीसमेत भइरहेको छ।
स्वास्थ्यकर्मीको अभाव पहिचान गरी परिचालनमा सहयोग
बाढी तथा अन्य विपद्का समयमा कुन क्षेत्रमा कति र कस्ता स्वास्थ्य जनशक्ति आवश्यक छन् भन्ने पहिचान गर्न परिषद्ले स्वास्थ्य जनशक्तिसम्बन्धी तथ्यांक प्रयोग गर्ने जनाएको छ।
यसबाट प्रभावित क्षेत्रमा देखिएको जनशक्ति अभाव, विशेषज्ञ जनशक्तिको आवश्यकता र थप जनशक्ति परिचालन गर्नुपर्ने अवस्था पहिचान गर्न सरकारलाई सहयोग पुग्ने अध्यक्ष पौडेलको भनाइ छ।
परिषद्ले विपद् तथा आपत्कालीन अवस्थामा काम गर्ने स्वास्थ्यकर्मीका लागि आवश्यक ज्ञान, सीप, नैतिक जिम्मेवारी र कार्यक्षेत्र निर्धारण गर्ने आपत्कालीन दक्षता मापदण्ड विकास गर्ने तयारीसमेत गरेको छ।
संक्रमण रोकथाम र मानसिक स्वास्थ्यमा समेत जोड
परिषद्ले स्वास्थ्यकर्मीका लागि आपत्कालीन उपचार, महामारीको तयारी तथा प्रतिक्रिया, संक्रमण रोकथाम तथा नियन्त्रण, रोग निगरानी, जोखिम सञ्चार, मनोवैज्ञानिक प्राथमिक उपचार, बिरामी रेफरललगायत विषयमा लक्षित तालिम तथा पुनर्ताजगी कार्यक्रम सञ्चालन गर्न सहयोग गर्ने जनाएको छ।
अध्यक्ष पौडेलका अनुसार विपद्पछिको स्वास्थ्य चुनौती उपचारमा मात्र सीमित हुँदैन। रोगको सम्भावित प्रकोप रोकथाम, मानसिक स्वास्थ्य, पुनर्स्थापना तथा दीर्घकालीन स्वास्थ्य सेवाका लागि दक्ष जनशक्ति तयार राख्नु पनि उत्तिकै आवश्यक छ।
परिषद्ले आगामी दिनमा सरकार र सम्बन्धित स्वास्थ्य निकायसँग समन्वय गर्दै बाढी प्रभावित क्षेत्रको आवश्यकता अनुसार स्वास्थ्य जनशक्ति व्यवस्थापन र आपत्कालीन स्वास्थ्य सेवाको क्षमता अभिवृद्धिमा सहयोग गर्ने जनाएको छ।
