देशैभरिबाट दशौं हजार कार्यकर्ता राजधानीमा प्रदर्शन गरेर चर्चा बटुलेको विप्लव समूहभित्र कार्यदिशाको विषयमा गम्भीर बहस चलेको खुलासा भएको छ ।
‘एकीकृत जनक्रान्ति’ को राजनैतिक कार्यदिशा अँगालेको विप्लव नेतृत्वको ‘नेपाल कम्युनिष्ट पार्टी’ भित्र सशस्त्र संघर्षको स्वरुपका विषयमा विवाद भएको श्रोतले जनायो ।
श्रोतका अनुसार, नेपालमा यसअघि पनि तत्कालिन माओवादीले सशस्त्र संघर्ष सञ्चालन गरेपनि सम्झौतामा आन्दोलन टुंग्याउनु परेको यथार्थलाई विश्लेषण गर्ने विषयमा शीर्ष नेतृत्वबीच अहिले बहस चलेको छ ।
पार्टीको शीर्ष तहमा रहेका नेत्रबिक्रम चन्द ‘विप्लव’, खडकबहादुर विश्वकर्मा ‘प्रकाण्ड’, हेमन्त प्रकाश ओली ‘सुदर्शन’, इश्वरी दाहाल, धर्मेन्द्र बास्तोलालगायतबीच नै यस विषयमा एकरुपता कायम हुन सकेको छैन ।
पार्टीभित्र कार्यदिशामा एकरुपता नहुँदा व्यापक अराजकता छाएको र गुटले प्रश्रय पाएको छ ।
“प्रकाण्ड कमरेडहरुले हतियार नै उठाएर ग्रामीण तहबाट सशस्त्र संघर्ष गर्ने र राजधानीमा छापामार शैलीमा सशस्त्र संघर्ष गर्नुपर्ने कुरा गर्नु भएको छ ।” श्रोतले भन्यो, “तर विप्लव कमरेडले भने यो मान्नु भएको छैन । जनसंघर्ष नै अहिलेको प्रधान कार्यनीति बनाउनुपर्नेमा वहाँको जोड छ ।”
श्रोतका अनुसार, विप्लवले भने पार्टीले जनतन्त्र र जनजीविकाका मुद्दामा सघन जनसंघर्ष सञ्चालन गरी शक्ति सञ्चय गरेर अघि बढनुपर्ने र निर्णायक अवस्थामा तत्कालिन परिस्थिति हेरेर संघर्ष चलाउनुपर्ने मत राखेको श्रोतले बतायो ।
तर पार्टीभित्रको एउटा ठूलो तप्का भने जनसंघर्षसँगै अवैधानिक ढंगका ससाना हतियारबद्ध प्रकृतिका कार्यक्रम समेत गर्नुपर्ने मत राख्छन् । माओवादीले शुरुका दिनमा सुरु गरेका हतियारसहितका ससाना कार्वाही प्रकृतिका घटना भएमा यसले शक्ति झन बढन् उनीहरुको निश्कर्ष रहेको श्रोतको दावी छ ।
यद्यपी तल्लो तहमा सैन्य फर्मेसन गर्ने सवालमा भने पार्टीभित्र कुनै विवाद नभएको श्रोतले बतायो ।
“नियमित सेना बनाउन अहिले नै सम्भव नभएको र परिचालन गर्न नसकिने भएपनि तल्लोस्तरमा लडाकु दस्ता तयार गर्ने विषयमा सबै एकमत छन ।”
विप्लवका लागि तत्कालै सशस्त्र संघर्ष गर्ने अवस्था भने विद्यमान छैन । र, उसको कार्यदिशाले यो माग गर्दैन पनि ।
पछिल्ला गतिविधिहरु हेर्दा उनीहरु दबाबमूलक रणनीतिमा नै रहेको देखिन्छ । श्रोतका अनुसार, पार्टीभित्र कार्यदिशामा एकरुपता नहुँदा व्यापक अराजकता छाएको र गुटले प्रश्रय पाएको छ ।
एमाले र माओवादी केन्द्रबीच एकता भएपछि असन्तुष्ट ठूलो जमातले आफूलाई समर्थन गर्ने आँकलन गरेको विप्लव समूहलाई संगठनात्मकरुपमा भने एमाले माओवादी एकताले खासै फाइदा पुगेको देखिँदैन ।
बरु, यही बीचमा उनीहरुभित्रै आन्तरिक कलह चुलिएपछि पार्टीभित्र थप संकट देखिएको हो ।
“पार्टीको अन्तविरोध र विवाद हल गर्न राजधानीको भेला डाकिएको हो ।” श्रोतले भन्यो, “भेलाा उल्लेख्य सहभागिता भएपनि त्यो जनसमूहलाई कसरी संघर्षमा परिचालन गर्ने विषयमा भने पार्टीभित्र चर्को विवाद देखिन्छ ।”
सम्भवतः विप्लव समूहले तत्कालै वार्तामा आउन नचाहे पनि अर्को निर्वाचनमा जनपक्षिय शक्तिहरुको कार्यगत एकताको नाममा वैद्य, विप्लव, जनमोर्चालगायतका समूहले निर्वाचनमा भाग लिएर सदन संघर्षको कार्यनीति अख्तियार भने गर्न सक्छन् । श्रोतका अनुसार, यो विषयमा समेत ठूलो विवाद देखिन्छ ।
